Almatyda buryn-sońdy bolmaǵan qalyń qar jaýsa, jeksenbi kúni qalalyqtar Memlekettik ortalyq mýzeıge qaraı asyqty. О́ıtkeni, úsh birdeı uıym – Qazaqstan Respýblıkasy Memlekettik ortalyq mýzeıi, Japonııanyń Qazaqstandaǵy elshiligi men Qazaqstan-Japonııa adam resýrstaryn damytý ortalyǵy uıytqy bolǵan sharada almatylyqtardy kóp qyzyq kútip turǵan-dy.
Demalysqa sáıkes kelgen «Japonııanyń Almatydaǵy mádenıeti kúninde» talaı jumbaǵyn ishine búkken eldiń kórkin kóz aldymyzǵa ákelgen sátter boldy. Ǵajaıyp ǵıbadathanalary men jumaqtaı baqtary, qar basqan taý shyńdary men záýlim úıler, bolashaqtyń tehnologııasy men ǵasyrlyq dástúrler, qalalyq ómirdiń qarbalas tirshiligi men tabıǵattyń sulýlyǵy astasyp jatqan Japonııadan án men bıden bólek, ónerdiń de túr-túri kelgen eken.
Jeksenbilik merekege jınalǵandar Elbasynyń qarashanyń basynda Japonııaǵa barǵan resmı saparynyń sátti bolǵanyn eske alyp, dástúrleri uqsas elderdiń yntymaǵy munan bylaıǵy jerde de ulǵaımasa, kemimeıtinin aıtyp jatty.
Qonaqjaılyq kádemen Japonııanyń Almatydaǵy mádenıeti kúnin Memlekettik ortalyq mýzeı dırektorynyń orynbasary Bıbigúl Dandyǵaraeva ashyp, mýzeı 11 jyldan beri Japonııanyń Qazaqstandaǵy elshiligimen belsendi qarym-qatynas jasap kele jatqanyn atady. Bul sóz jalań emes. Máselen, Ortalyq mýzeıde ótken «Japonııa qýyrshaqtary», «Álem kımono jasaý sheberi Itıký Kýbotanyń kózimen», «Hırosıma men Nagasakı», «Isegatagamı» óneri sheberleriniń kartınalary kórmeleri sııaqty mádenı sharalar almatylyqtardyń úlken qyzyǵýshylyǵyn týdyryp, kelýshiler kóp bolǵan.
Japonııanyń Qazaqstandaǵy Tótenshe jáne ókiletti elshisi Itıro Kavabata óz kezeginde Bıbigúl Dandyǵaraevanyń sózin qýattap, sońǵy 10 jylda Japonııa elshiligi men Adamdar resýrstaryn damytýdyń Qazaqstan-Japonııa ortalyǵy bul eldiń mádenıetimen jaqyn tanysýdyń ǵajaıyp múmkindikterin usynǵanyn aıtty.
Eger Kúnshyǵys elinen kelgen qonaqtarǵa osy elde biraz jyl turyp, japon tili men ónerin úırengen Tóreǵalı Aıtmurattyń dástúrli sıamısen mýzykalyq aspabynda oınap, án salýy unasa, qazaqtardy Kúnshyǵys elinen kelgen qyzdyń jasaǵan ıkebanalary tánti etti.
Aınash ESALI,
«Egemen Qazaqstan»
ALMATY