Qytaı kásipkerleri Qazaqstandaǵy omarta sharýashylyǵynyń damýyna qyzyǵýshylyq tanytýda. Sonyń bir aıǵaǵy retinde QHR Aýyl sharýashylyǵy mınıstrligi sapa ınspeksııasy jáne karantın jónindegi bas basqarma tóraǵasynyń orynbasary Meı Kebao jetekshilik etken delegasııanyń Arshaly aýdanyna arnaıy kelýin aıtýǵa bolady. Kórshi eldegi isker qaýym ókilderin Qazaqstan Respýblıkasy Aýyl sharýashylyǵy vıse-mınıstri Gúlmıra Isaeva men aýdan ákimi Azamat Taıjanov qarsy aldy.
Qonaqtar Aqmola oblysyna áıgili ári baı tájirıbe ıesi Anatolıı Dobrovolskııdiń Babataı temir jol stansasyndaǵy omarta sharýashylyǵynda bolyp, atqarylyp jatqan istermen tanysty. Sharýashylyq ıesi A.Dobrovolskıı bal jınaý jumysy jaıly jan-jaqty áńgimelep, qytaılyq áriptesterimen tájirıbe bólisti.
Sondaı-aq, kezdesý barysynda elge belgili omartashylar Sandyqtaý aýdanyndaǵy Balqashyn kentinen kelgen Stanıslav Bogomolov pen Arshaly aýdanyndaǵy Ijev aýylynyń turǵyny Iýrıı Lagýtın óz kásipteriniń qyr-syry men bolashaǵy jaıly egjeı-tegjeıli aıtyp, qoıylǵan suraqtarǵa tolymdy jaýaptar qaıtardy.
Aýdandaǵy omarta sharýashylyǵynyń uıymdastyrylýymen tanysyp, daıyn ónimnen dám tatqan qonaqtar Aqmola balynyń ereksheligi men sapasyna joǵary baǵasyn berdi. О́zara túsinistik ahýalyndaǵy pikir almasý barysynda Meı Kebao myrza Aqmola balyna Qytaı tarapynan qyzyǵýshylyq baryn atap kórsetip, aldaǵy ýaqytta baǵaly ónimdi jetkizý máselesine múddelilik bildirdi. Kelisimsharttar rásimdeý kúni de alys emestigi baıqaldy.
– Elimizde omarta sharýashylyǵyn damytýǵa erekshe kóńil bóline bastaǵany qýantady, – dedi bizben áńgimesinde A.Dobrovolskıı. Aýyl sharýashylyǵy mınıstrligi de osynaý paıdaly salaǵa qoldaý kórsetýde. Bul degenińiz jańa jumys oryndary, naryqqa tabıǵı taza ónim shyǵarý ári el ekonomıkasyna qosymsha kapıtal tartý bolyp tabylady.