Búgin QR Premer-Mınıstri B.Saǵyntaevtyń tóraǵalyǵymen ótken Úkimet otyrysynda «QR keıbir zańnamalyq aktilerine elektr energetıkasy máseleleri boıynsha ózgerister men tolyqtyrýlar engizý týraly» zań jobasy tanystyryldy.
Energetıka mınıstri Qanat Bozymbaev óz baıandamasynda atap ótkendeı, zań jobasy Memleket basshysynyń «100 naqty qadam» Ult Josparynyń» 51-qadamynda aıqyndalǵan mindetterdi iske asyrý maqsatynda ázirlengen.
- Osy Zań jobasyn ázirleýdegi negizgi maqsat – energııa berýshi uıymdardyń sanyn qysqartý. Aǵymdaǵy jylǵy 1 qarashadaǵy jaǵdaı boıynsha, olardyń sany júz alpysty quraıdy. Sonyń ishinde júıelik operator - «KEGOC» aksıonerlik qoǵamyn, 19 О́ńirlik Elektr jelilik kompanııany, 27 memlekettik kásiporyndy jáne 113 shaǵyn jáne orta energııa berýshi uıymdy atap ótýge bolady,- dedi mınıstr.
Q.Bozymbaev óz baıandamasynda bul qujattyń birqatar ereksheligin atap ótti.
- Zań jobasynda kórsetilgen mehanızmderdi iske asyrý energııa berýshi uıymdardy irilendirýge múmkindik beredi. Bul óz kezeginde energııa berýshi uıymdar sanynyń azaıýyna, energııamen jabdyqtaý senimdiligin arttyrýǵa, elektr energııasyn berý qyzmeti úshin tólem engizý boıynsha tutynýshylar shyǵyndarynyń azaıýyna, ıesiz elektr jelilerin energııa bershi uıymdardyń balansyna berýge ákeledi,- dedi Energetıka mınıstri.
Aǵymdaǵy jylǵy qazan aıynda Úkimet janyndaǵy Zań jobalaý qyzmeti máseleleri jónindegi vedomstvoaralyq komıssııanyń otyrysynda Zań jobasynyń jańartylǵan Tujyrymdamasy maquldanǵan bolatyn. Osy qujat boıynsha Tujyrymdamany qaraý alǵash ret buqaralyq aqparat quraldarynyń qatysýymen ótkendigin atap ótken jón.
Arnur ASQAROV,
"Egemen Qazaqstan".