Ádilet mınıstri Marat Beketaevtyń aıtýynsha, búgingi Úkimet otyrysynda qaralǵan zııatkerlik menshik salasyndaǵy zań jobasynda taýar belgisin zańsyz qoldanǵanyna baılanysty ótemaqy alý úshin quqyq ıeleriniń quqyqtaryn qamtamasyz etýge arnalǵan normalar qaralǵan.
Avtorlyq quqyq týraly Zańda avtorlyq týyndyny zańsyz qoldanǵanyna baılanysty quqyq buzýshydan ótemaqy alýda avtor quqyǵy qaralǵan. Spıkerdiń aıtýynsha, taýar belgisiniń ıesi mundaı quqyqqa ıe bola almaıdy. Osyǵan baılanysty, Azamattyq kodekske quqyq buzýshydan keltirilgen shyǵynnyń ornyna sot bekitken 500-10 000 AEK kóleminde nemese zańsyz taýar belgisi ornatylǵan taýardyń qunynan eki ese ótemaqy talap etý jóninde taýar belgisi ıesiniń quqyǵy týraly tolyqtyrýlar engiziledi.
Aıta keteıik, «Zııatkerlik menshik salasyndaǵy zańnamany jetildirý máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zań jobasy zııatkerlik menshik salasyndaǵy ákimshilik kedergilerdi azaıtýǵa baǵyttalǵan.
Aıan Ábdýálı,
"Egemen Qazaqstan".