Elektr jelilik kompanııalaryn keńeıtý máselesin QR Úkimetiniń otyrysynda usynylǵan «Elektr energııasynyń máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zań jobasy retteıdi. Zań jobasynda elektr taratýshy uıymdarǵa 2018-2022 jyldar aralyǵynda kezeń-kezeńimen engiziletin talap qarastyrylady.
Ázirlengen Zań jobasy Qazaqstan Respýblıkasynyń 2 Kodeksine jáne 3 Zańyna ózgerister men tolyqtyrýlar engizýdi kózdeıdi. Olar – Salyq kodeksi, Ákimshilik quqyq buzýshylyq týraly kodeks, «Elektr energetıkasy týraly», «Tabıǵı monopolııalar jáne retteletin naryqtar týraly», sondaı-aq «Memlekettik múlik týraly» zańdar. «Energııa berýshi uıymdardy irilendirý máselesi Zań jobasynda 5 negizgi mehanızm boıynsha qaraldy, olar: ıesiz elektr jelilerin qabyldaǵan kezde energııa berýshi uıymdardy korporatıvtik tabys salyǵynan jáne múlik salyǵynan bosatý; energııa berýshi uıymdar úshin tabıǵı monpolııalar salasyndaǵy zańnamada kózdelgen tyıym salýdy alyp tastaý; elektr jelilerin keńeıtken kezde energııa berýshi uıymdar tarıfteriniń shekti deńgeılerin qaıta qaraý múmkindigi; memlekettik kásiporyndar balansyndaǵy elektr jelilerin berý; energııa berýshi uıymdardyń qyzmetine talaptar engizý», - dedi Q.Bozymbaev.Sonymen qatar Energetıka mınıstri elimizde anyqtalǵan 4 580 km-den astam ıesiz jatqan elektr jelisi máselesi sheshilip jatqanyn málimdedi. Budan bólek, 1300-den asa transformatorlyq qosalqy stansııanyń bar ekeni belgili boldy.
«Osyǵan baılanysty Zań jobasy yntalandyrý mehanızmin qarastyrady. Naqtyraq toqtalar bolsaq: energııa berýshi uıymdar ıesiz elektr jelilerin óz balansyna tegin alǵan ýaqytta korporatıvtik tabys salyǵynan (20%) jáne múlik salyǵynan (1,5%) bosatylady. Osy normalardy engizý aldymen ıesiz elektr jelilerin óz balansyna qabyldaýy úshin energııa berýshi uıymdardyń qyzyǵýshylyǵyn arttyrýǵa qajet», - dedi Energetıka mınıstri. Qanat Bozymbaevtyń aıtýynsha, saıyp kelgende 2020 jylǵa taman Energııa óndirýshi jáne energııa berýshi uıymnyń sany 120-130-dy quraıdy, energııamen jabdyqtaý senimdiligi kúsheıedi, tutynýshylardyń elektr energııasyn qoldanǵany úshin tólemaqy qyzmeti azaıady.О́ńirlik elektr jelilik kompanııalardy irilendirý «100 naqty qadam» Ult Josparynyń» 51-qadamynda kórsetilgen.
Aıan Ábdýálı,
"Egemen Qazaqstan".