Ǵıbratqa toly ómirin Otanynyń qaýipsizdigi men damyp, órleýine arnaǵan, halqynyń senimin aqtap, yqylasyna ıe bolǵan tulǵalardyń biri - áskerı-ushqysh, armııa generaly, Halyq qaharmany Muhtar Altynbaev.
Muhtar Qapashuly qarapaıym jumysshy otbasynda týǵan. Ol qazaq orta mektebiniń 10-11-synypta oqyp júrgen kezde-aq aeroklýbqa baryp shaǵyn ushaqtarmen ushady. Bolashaq ushqysh óziniń eńbek jolyn 17 jasynda shahtada kómir qazyp jumysshy bolýdan bastady. Qaraǵandylyq jas jigit alty jyldaı jer astynda aýyr eńbekpen aınalysyp júrgen kezde de, áýede ushý armany oıynan ketpedi. Qol eńbegimen aınalysyp júrse de, ushqyshtardy daıyndaıtyn áskerı ortalyqtan qol úzbeıdi. Sóıtip zapastaǵy kishi-leıtenant shenine ıe bolady.
24 jasynda balalyq shaǵynan kele jatqan armany jetelep, Krasnodar ólkesiniń Armavır qalasyndaǵy ushqyshtar áskerı ýchılıshesine túsedi. Tańdaǵan mamandyǵyna qoly jetken jigit oqýdy úzdik bitiredi. Budan keıin Tver qalasyndaǵy marshal G.K.Jýkov atyndaǵy 1985 j. ÁShQ Áskerı komandalyq akademııasyn qyzyl dıplommen aıaqtaıdy. Áskerı eńbek jolynda Odaq qalalarynda áskerı tapsyrmalarmen elden jyraqta ómir súrip, áskerı ıstrebıtel ushaqtardyń san túrlerin basqarýdy ıgeredi. Ol otanymyzdyń qarýly kúshter salasynda 40 jylǵa jýyq qyzmet atqarǵan tájirıbeli basshy. M.Qapashuly birde telearnadan bergen suhbatynda: «adam óz jasaǵan isine kóńili tolyp jaıbaraqat júretin bolsa, ol toqyraı bastaıdy. Sondyqtan qandaı bıikke qol jetkizseń de, óz isińdegi kemshilikterdi kórip, ony túzetý úshin alǵa qaraı umtyla bilý kerek», dedi.
Áskerı-kásibı eńbek jolyn aǵa ushqyshtan bastap, 1992 elge oralǵan soń Qazaqstan Respýblıkasynyń Qorǵanys mınıstrine (1996, 2001) deıingi óte jaýapty qyzmetterdi abyroımen atqardy. Sol jyldary Ýralsk áskerı okrýgi Áýe shabýylyna qarsy qorǵanys avıasııasy polkiniń komandıri bolyp taǵaıyndalǵanda M.Altynbaev basshylyǵyndaǵy polk KSRO-daǵy eń joǵary deńgeıdegi úzdik polk bolǵan eken. Shetel mamandary onyń kásibı sheberligin joǵary baǵalady.
Halyq qaharmany Baqytjan Ertaev Muhtar aǵa týraly: «Ol jol taýyp óziniń buıryǵyn oryndata biledi, ózin syılata biledi. Minezinde dıplomattyǵy men jaýapkershilikke qataldyǵy da bar. Boıynda adamgershiligi joǵary» degen baǵasy kórermenniń esinde.
Muhtar Qapashuly halyq qalaýlysy, eliniń maqtanyshy, patrıot tulǵa. Onyń abyroımen atqarǵan áskerı qyzmet joly óskeleń urpaqtyń eliniń adal uly, azamaty bolyp ósýine úlgi bolmaq. Qazaqstannyń qorǵanys salasynyń bekip, nyǵaıýyna orasan úles qosqan tulǵanyń biri jáne biregeıi. 2010 jyldan Elbasynyń Jarlyǵymen QR Parlamenti Senatynyń depýtaty bolyp taǵaıyndaldy.
Eliniń er ulandarynyń Otan aldyndaǵy atqarǵan paryzyn jas urpaqqa, ortamyzda nasıhattaýdy ulttyq «Tabystyń 100 qadamy» jobasy óziniń maqsaty etip qoıdy.
Baqyt Joldybaıqyzy