QR Úkimeti otyrysynyń qorytyndysy boıynsha ótken baspasóz máslıhatynda Bilim jáne ǵylym vıse-mınıstri Elmıra Sýhanberdıeva UBT jańa formatyn engizý talapkerlerdiń JOO-ǵa túsýine qosymsha kedergi týyndatpaıtynyn habarlady.
«Menińshe, emtıhan tapsyrýǵa baılanysty JOO-ǵa túsýge eshqandaı kedergi joq. Bul jerde barlyǵy naqty kórsetilgen. Kerisinshe, biz balalardyń mindetin jeńildettik. 11 jyl boıy mektepte oqyǵanyna baılanysty qorytyndy attestasııany bala óz mektebiniń qabyrǵasynda tapsyrady, bıletpen daıyndalady. JOO-ǵa túsýge qatysty eshqandaı aıqaı-shý bolmaýǵa tıis. UBT-nyń jańa formaty – kez kelgen oqýshy úshin grant ıelený múmkindigi, sol sebepti barlyǵyna birdeı jaǵdaı jasalady»,-dedi E.Sýhanberdıeva.
2017 jyly túlekterdiń qorytyndy attestasııasyn jańa júıe boıynsha ótkizý usynylyp otyrǵanyn aıta ketý kerek. Jańa júıe boıynsha, ol mekteptegi bitirý emtıhany jáne JOO-ǵa túsýge jol ashatyn UBT túrinde bolady.
Úkimet otyrysynda QR Premer-Mınıstri Baqytjan Saǵyntaev UBT-2017-ni ótkizýge ázirlik jumystaryn qazirden bastaý kerektigin jáne ony joǵary deńgeıde júrgizý kerektigin atap aıtty.
Arnur ASQAR,
"Egemen Qazaqstan".