Qostanaıda satırık jazýshy Ǵumar Ahmetchınniń 75 jasqa tolýyna oraı onyń shyǵarmashylyǵyna arnalǵan ádebı kesh ótti. Jazýshyǵa oblys ákiminiń orynbasary Marat Júndibaev oblys ákimi Arhımed Muhambetovtyń quttyqtaýyn jetkizip, halqymyzdyń saltymen shapan jaýyp, syı-sııapat kórsetti.
Oblystyq ardagerler keńesiniń tóraǵasy Kenjebek Ýkın aǵa býyn ókilderiniń quttyqtaýyn jetkizdi. Aqyndar Serikbaı Ospanov pen Naǵashybaı Muqatov jazýshynyń shyǵarmalaryna toqtaldy. Olar Ǵumar aǵany Qostanaıdaǵy qalam ustaǵandardyń birneshe tolqynyna ustaz dep atady. A.Baıtursynov atyndaǵy Qostanaı memlekettik ýnıversıtetiniń prorektory Almas Ábsadyqov toı ıesine bilim ordasy ujymynyń atynan jyly lebizin arnady.
Ǵumar Ahmetchın tek proza ǵana jazbaıdy, óleń aýylyna da soǵyp otyrady. Keshte oblystaǵy I.Omarov atyndaǵy qazaq drama teatrynyń jas ártisteri jazýshynyń satıralyq jáne lırıkalyq óleńderin naqyshyna keltire oqydy. Kórermender kompozıtorlar Baqytjan Sáýekenovtyń, Qalıbek Derpsaldınniń Ǵumar Ahmetchınniń sózine jazylǵan ánderin tyńdady. Qalıbek «Arqanyń appaq qyzy» ánin ózi naqyshyna keltire oryndady.
Kesh sońynda toı ıesi Ǵumar Ahmetchın óz shyǵarmalarynan úzindiler oqydy. Sonymen qatar ol Táýelsiz elimizben birge ósip kele jatqan jastarǵa ósıet sózderin de arnady. Keshke kelgender jazýshy shyǵarmashylyǵy boıynsha uıymdastyrylǵan shaǵyn kórmeni de tamashalady.
Názıra Járimbetova,
"Egemen Qazaqstan".
Qostanaı