Pavlodarda ótip jatqan bokstan el chempıonaty aıasynda Qazaqstan ulttyq quramasynyń bas bapkeri Myrzaǵalı Aıtjanov oblystyq jáne qalalyq komandalardyń jattyqtyrýshylaryna semınar ótkizdi, dep habarlaıdy Qazaqstan boks federasııasynyń baspasóz qyzmeti.
Semınar barysynda bas bapker álemdik áýesqoı jáne kásibı boks arasyndaǵy básekelestiktiń artyp kele jatqandyǵyn, osyǵan baılanysty AIVA-nyń áleýmettik baǵdarlamalaryna sportshylardy qorǵaý jáne qoldaý sharalary engizilgendigin atap ótti. Sonymen qatar, ol Rıo Olımpıadasynan keıin qabyldanǵan tórelik etýdiń jańa júıesin, upaılardy sanaý júıesin túsindirip berdi.
О́z kezeginde M. Aıtjanov Olımpıada oıyndarynan keıin sportshylarmyzdyń kásibı boksqa aýysýǵa qulshynys tanytýy jıilep ketkendigin de basa aıtty. «Biz olardyń sporttyq mansap jolyn derbes tańdaý jasaýyna shekteý qoıa almaımyz. Biraq, memlekettiń olardy daıyndaýǵa qanshama kúsh pen qarjy jumsaǵandyǵyn qaperden shyǵarmaý qajet. Sizderdiń mindetterińiz olarǵa áýesqoı boksta múddeleri ár ýaqytta qorǵalatyndyǵyn, tipti úlken sporttan ketse de qoldaýǵa ıe bolatyndyǵyn túsindirý», – dedi ol. Onyń aıtýynsha, 2017 jyldan bastap sportshylardyń áýesqoıdan kásibı boksqa tosynnan aýysyp ketýine jol berilmeıtindi. Bul rette Qazaqstan boks federasııasy arnaıy ereje engizetindigin aıtty. Atalǵan erejege sáıkes sportshy kásibı boksqa aýysý oıyn federasııaǵa eskertýge mindetti jáne kelisim alǵannan keıin ǵana kete alady.