Kezinde Jambyl oblysy Moıynqum aýdanynda búkil qazaqtyń «Ata shopany» atanǵan Jazylbek Qýanyshbaevtyń joralǵyly jolyna túsip, qanattasa, qatarlasa júre jaqsy isin jarqyrata jalǵastyrǵandardyń biri Sosıalıstik Eńbek Eri Dildash Itbasova edi.
Ol kisi uzaq ýaqyt qoı baqqan. Qazaq KSR Joǵarǵy Keńesine eki ret depýtat bolyp saılanǵan. «Qazaq KSR mal sharýashylyǵyna eńbegi sińgen sheber» bolatyn.
Dep oılasań:
«Qumda qalaı bári ásem»,
Taǵy aıtaıyn
(men de qumnyń balasy em).
Moıynqumdy
Dildash bolyp túsin de,
Berekesin Dildash bolyp
sana sen!
– dep jyrlapty sol bir shaqta qazaqtyń belgili aqyny Jaqsylyq Sátibekov (birneshe jyl respýblıkalyq «Sosıalıstik Qazaqstan» gazetiniń Jambyl oblysyndaǵy menshikti tilshisi qyzmetin abyroıly atqarǵan).
...1983 jyl. Moıynqumdaǵy Tulparsaz jaılaýy. Búkil oblys, aýdan jurtshylyǵy Er ana – Dildash apanyń 70 jyldyǵyn aıryqsha saltanatpen atap ótti.
Myna sýret sol toıda túsirilgen. Otyrǵandar: «Aıdarly» keńsharynyń ataqty jylqyshysy Maıkót Qarsaqov (soldan ońǵa qaraı), Sosıalıstik Eńbek Eri, Baızaq aýdanynyń ataqty qyzylsha ósirýshisi Syndybala Ońǵarbaeva, eńbek pen erlikti, birlik pen yntymaqty yrlap otyrǵan qyrǵyz aqyny Estemes Tursynalıev, toı ıesi Dildash apa, Sosıalıstik Eńbek Eri Darıǵa Jantoqova (bul kisi de Baızaq aýdanynda qyzylshashy bolǵan) jáne aýpartkomnyń úshinshi, ıaǵnı ıdeologııa jónindegi hatshysy Jumabek Orynbaev (búginde Jambyl oblysy, Shý aýdanynyń ortalyǵy Tóle bı aýylynda turady, seksen úsh jasta).
Biz sonda keýdeleri altyn shapaqty kúndeı jaryq shashyp, gúldeı jaınaǵan osynaý «Úsh qurbynyń» ádemi otyrysyn kórip, áserli áńgimelerin estigen soń aýdandyq gazetke «Jerdegi juldyzdar» atty maqala jazǵan edik...
Berikbaı QADYQOV, jýrnalıst
Almaty oblysy,
Qarasaı aýdany