Alataý bókterindegi ásem shaharda ornalasqan Balýan Sholaq atyndaǵy sport saraıynda «Almaty Barysy» týrnıri ótti. Osy jarys barysynda ár aýdannyń úzdikteri ózara kúsh synasyp, jazda jalaýy jelbireıtin jyldyń basty dodasyna qatysýǵa múmkindik beretin qos joldamany sarapqa saldy.
Ulttyq ónerimizdi ulyqtaıtyn sharany tamashalaý úshin ár jyldary halyqaralyq arenada el sportynyń abyroıyn asqaqtatyp, memleketimizdiń maqtanyshyna aınalǵan azamattar kóptep keldi. Al boz kilemdegi básekelerge keletin bolsaq, aqtyq synda kúsh synasý qurmetine bólengen qos balýannyń ózgelerden shoqtyǵy bıik turǵany birden ańǵaryldy. Barlyq qarsylastaryn qapy qaldyrǵan Rýslan Ábdirazaqov pen Dáýren Nuralınov bas júlde úshin talasty.
Jankúıerler de, mamandar da bul básekeniń favorıti retinde Medeý aýdany ókiliniń esimin atady. Árıne oǵan tańdanýǵa bolmas. Sebebi Ábdirazaqov qazaq kúresinen ótken talaı dúbirli dodalarda dara shyqqan. «Álem Barysy», «Eýrazııa Barysy» týrnırlerinde asqan sheberlik tanytyp, kópshiliktiń qoshemetine bólendi. «Qazaqstan Barysy» básekesinde júldegerler qatarynan kórindi. Álem chempıony degen ataǵy taǵy bar. Onyń ústine, byltyrǵy osy jarystyń fınalynda Rýslan Dáýrendi utqan bolatyn. Biraq bul joly bári basqasha boldy. Túrkisib aýdanynyń atynan shyqqan Dáýren Nuralınov aıtýly jarysqa keremet daıarlyqpen kelgen eken. Sheshýshi tusta ózinen boıy da uzyn, salmaǵy da baqandaı 10 kıloǵa aýyr saqa sportshyny san soqtyryp ketti (Ábdirazaqovtyń salmaǵy – 132 kılo, Nuralınovtiń salmaǵy – 122 kılo – red.).
Osylaısha, Dáýren Nuralınov «Almaty Barysy» atanyp, bas júldege tigilgen «Lada Prıora» kóligin tizgindedi. Kúmis júldeger Rýslan Ábdirazaqovqa 300 myń teńge buıyrdy. Al qola medaldi ıelengen Alataý aýdanynyń ókili Eldar Násıev 100 myń teńgeni qaltaǵa basty.
Ǵalym SÚLEIMEN,
«Egemen Qazaqstan»
ALMATY