Túrkistan oblysy ákimdiginiń tapsyrysymen «Ońtústikfılm» KMM-si men «SAQ» kınostýdııasy túsirgen fılmde álemge áıgili ǵulama Ál-Farabıdiń balalyq shaǵy, bilim jolyndaǵy alǵashqy qadamy, jańashyldyqqa degen umtylysy sıpattalady. Bilimin el ıgiligine jumsaǵan ǵulamanyń óz eline degen súıispenshiligi, Otanǵa qyzmet etýdegi qaıratkerligi sýrettelgen. Tarıhı derekterge qaraǵanda, Ál-Farabı qazirgi Otyrar aýdany aýmaǵyndaǵy Oqsyz qalashyǵynda dúnıege kelgen. Sondyqtan fılmniń aty da «Oqsyz oqıǵasy» dep qoıylǵan. 3D formatta ázirlengen 25 mınýttyq fılmniń rejısseri Nýrıddın Patteev jas urpaqty otansúıgishtikke baýlyp, uly tulǵalarǵa, tarıhqa degen qurmetti oıatý maqsatyndaǵy fılmderdi túsirý jumystary jalǵasatynyn aıtty. Al «Túrkistan» anımasııalyq fılmi men «Tóle bı» atty 10 serııaly kınohıkaıa jaqynda kórermenge jol tartady.
Jalpy «SAQ» kınostýdııasy ótken jyly oblys ákimdiginiń tikeleı qoldaýymen «Kúsh atasy – Qajymuqan», «Otyrardy qorǵaý», «Kıeli Qazyǵurt» anımasııalyq fılmderin jáne «Kóne jetigenniń syry» atty 10 serııaly telehıkaıa men «Uly Jibek Joly boıyndaǵy kóne qalalar» derekti fılmin, «Ordabasy – birliktiń týy» fılmderin jurtshylyqqa usynǵan bolatyn.
Túrkistan oblysy