Búginde qalanyń ákimshilik-iskerlik ortalyǵynda boı kóterip jatqan oblys ákimdigi, basqarmalar jáne departamentter ǵımarattary, Medıa-ortalyq pen Kongress-holldyń qurylys alańdarynda jumys qyzý. Úkimet basshysynyń sapary barysynda áleýmettik nysandar da nazardan tys qalmady. Halyqtyń jaıly ómir súrýin qamtamasyz etý maqsatynda júrgizilip jatqan abattandyrý jáne kóriktendirý jumystary da josparǵa saı júrgizilýde. Tuńǵysh Prezıdent saıabaǵy, qalalyq oıyn-saýyq parki, mýzykalyq fontan, amfıteatr jáne Arbattaǵy qurylys jumystaryn da keste boıynsha júrgizip, ýaqytynda aıaqtaý mindettelgen.
Qurylys jumystarymen tanysyp shyqqan Premer-Mınıstr Túrkistan qalasynyń 2019–2020 jyldarǵa arnalǵan keshendi qurylys jáne damytý josparyn iske asyrý máseleleri jóninde jumys keńesin ótkizdi. Túrkistan oblysynyń ákimi О́. Shókeev qurylys, tarıhı-mádenı nysandardy rekonstrýksııalaý, turǵyn úı máselelerin sheshý, ınjenerlik-kommýnıkasııalyq ınfraqurylym júrgizý, joldardyń sapasyn arttyrý, týrızm, aýyl sharýashylyǵy salalaryn, arnaıy ekonomıkalyq aımaqty damytý baǵytynda atqarylyp jatqan jumystar týraly baıandady. Elbasy tapsyrmasyna sáıkes 29 nysannyń qurylysy óńirler, ulttyq kompanııalar jáne bıznes ókilderine bekitilgen. Oblys ákiminiń aıtýynsha, búginde 10 nysanda qurylys jumystary óndiristik kestege sáıkes júrgizilýde, al 4 nysanda qurylys jumystary baıaý bolsa, 2 nysanda jumys bastalmaǵan. Bıyl 7 nysan paıdalanýǵa beriledi. Onyń ishinde ákimshilik-iskerlik ortalyǵynda salynyp jatqan 900 oryndyq mekteptiń qurylysy bar. Sondaı-aq, oblys ákimi «Rýhanı-mádenı ortalyqta» salynyp jatqan 9 nysanǵa toqtaldy. Olardyń úsheýinde qurylys jumystary baıaý, al taǵy úsheýinde qurylys alańy qorshalǵanymen jumys bastalmapty. Baıandamasynyń sońynda oblys ákimi birqatar máseleler boıynsha Úkimet tarapynan qoldaý qajettigin aıtty.
Keńesti qorytyndylaǵan Premer-Mınıstr A.Mamın qurylys jumystaryn qarqyndatýdy jáne sharýany jospar boıynsha atqarýdy tapsyrdy. «Kúsheıtilgen jumys tártibine kóshemiz», — dep Úkimet basshysy, «eki apta ishinde qurylys jumystaryn táýlik boıǵy rejımge kóshirýdi» tapsyrdy.
Túrkistan oblysy