«Memlekettik rámizderdi qurmetteý – otanshyldyqtyń belgisi. Kezinde Túrkistannyń saıypqyrany Bekzat Sattarhanov Sıdneı tórinde chempıon atanyp, rámizderimizdi kúlli álemge tanytty. Mine, qazirgi jastar sol Bekzat batyrdaı namysty bolyp, elge qyzmet etýleri tıis. Barshańyzdy memlekettik rámizder kúnimen quttyqtaımyn! Eltańbamyz máńgi jarqyrap, kók týymyz máńgi jelbireı bersin. Kúlli Alashtyń bolashaǵy jarqyn bolsyn!», – dedi M.Otarbaev. Merekelik sharalar aıasynda kitap kórmesi ótip, aqyndar men ánshiler otanshyldyqqa shaqyratyn shyǵarmalaryn oryndady. Tulpar mingen jigitter kók týdy jelbiretip, Túrkistan turǵyndary men qonaqtaryna asqaq rýh pen jiger syılady. Sondaı-aq «Asyl qazyna» ájeler ansambli, oqýshylardyń hor ujymy, «Semser», «Bolashaq» toptary men «Shabyt», «Bısultan» bıshiler toby óner kórsetti. Sarbazdar men «Jas sarbazdar» klýbynyń músheleri memlekettik rámizderdi ortaǵa alyp shyǵyp, qundylyqtardy qurmetteý jóninde uran tastady.
Al Jetisaı aýdanynyń ortalyǵy Jetisaı qalasynda Memlekettik rámizderi kúni aıasynda «Meniń týym» atty aksııa uıymdastyryldy. Shara barysynda jetisaılyq jastar qalanyń kórikti kóshelerinde velo, moto, avtosherý ótkizip, merekeniń mańyzyn aıshyqtaı tústi.
Memlekettik rámizderdi qurmetteýge shaqyrǵan is-sharalar túrkistandyqtarǵa kóterińki kóńil-kúı syılap, otanshyldyq dáripteldi.
Túrkistan oblysy