Jas kezinen tula boıyna ata-anasynyń jáne halqymyzdyń eń asyl qasıetteri daryǵan, óndiriste, partııa jáne keńes uıymdarynda jaýapty jumystarda shyńdalǵan Nursultan Ábishuly el basqarý kezeńine mol tájirıbe jınaqtap keldi. Men Nursultan Ábishulynyń qurdasymyn, onymen 50 jyldyq tanystyǵym bar. Onyń ómiri meniń kóz aldymda ótip jatyr.
Kóp jyl boıy Tuńǵysh Prezıdent N.Nazarbaevtyń qol astynda qyzmet etý múmkindigi buıyrǵany úshin taǵdyryma rızashylyǵymdy bildiremin.
Nursultan Ábishulynyń sarabdal saıasatynyń arqasynda osynsha qysqa ýaqytta demokratııalyq joldy ustanǵan jańa úlgidegi Qazaqstan memleketi quryldy. Qazaqstan álem moıyndaǵan tanymal memleketke aınalyp, 50 damyǵan eldiń qataryna qosyldy. Qazaqstandaǵy túrli etnos ókilderi bir shańyraqtyń astynda beıbit kún keship jatyr. Elbasy N.Nazarbaev bedeldi memleketter basshylary men jahandyq masshtabtaǵy saıasatkerlerdiń qatarynan oıyp turyp oryn aldy.
Keńes Odaǵynyń taraýy men táýelsizdiktiń alǵashqy jyldary Qazaqstan halqy men Tuńǵysh Prezıdent úshin qıyn kezeń boldy. Sol jyldary memlekettiń ekonomıkasy men áleýmettik jaǵdaıy múshkil edi. Bul jerde dereý sheshim qabyldaý kerek bolatyn. Ekonomıkany qalaı damytý kerek? Neden bastaý kerek? Suraqtar kóp edi.
Elbasy memlekettegi kómir-munaı óndirisiniń jańa kózderin izdeýge basa nazar aýdardy. Nátıjesinde Teńiz, Qarashyǵanaq, Qumkól sııaqty ondaǵan úlken kásiporyn ashyldy. Munaı men gaz álemdegi eń qajet resýrs ári suranysta edi.
Alǵashqy sheteldik ınvestor AQSh-tyń tanymal munaı korporasııasy Shevron boldy. Olar munaı kompanııasynyń josparyn usyndy. Kóp uzamaı birlesken «Teńizshevroıl» kásiporyny quryldy. Sonyń arqasynda elimizge mıllıardtaǵan ınvestısııa tartyldy.
Sol kezde elimizde ınvestısııa sharttarynyń oryndalýyna kepildik beretin zańdar bolmady. Biraq ınvestorlar Tuńǵysh Prezıdent N.Nazarbaevqa sengen edi. Sodan álemdik qoǵamdastyq Qazaqstanda munaı men gazdyń úlken qorlary bar ekenin bilgesin, «Ekson», «Mobıl», «Shell», «Brıtısh Petroleým», «Statoıl», «Enı», «Adjıp» sııaqty munaı kompanııalary ınvestısııalaryn ákele bastady.
Munaı-gaz salasy qarqyndy damyp, búkil Qazaqstan ekonomıkasynyń lokomotıvine aınaldy. Bul óz kezeginde basqa sektorlar men búkil eldiń damýyna eleýli áser etti.
Osy jyldyń 19 naýryzynda N.Nazarbaev óziniń prezıdenttik ókilettigin toqtatatyny týraly málimdedi. Nursultan Ábishulynyń jaqtastary bul habardy qımastyqpen qabyl aldy. О́ıtkeni Konstıtýsııaǵa sáıkes Tuńǵysh Prezıdent ókilettiginiń merzimi áli de aıaqtalmaǵan edi. Deı turǵanmen, olar únemi durys sheshim qabyldaıtyn Nursultan Ábishulynyń danalyǵyna sendi.
Tuńǵysh Prezıdenttiń Qazaqstan Respýblıkasy Qaýipsizdik Keńesiniń Tóraǵasy bolyp qalatyny, el úshin qyzmet ete beretini oń sheshim boldy. Álemde memlekettiń negizin salýshylar el saıasatynda qalyp, jaqsy jetistikterge jetkenine kóp mysal bar.
Nur Otan partııasynyń XIX sezinde partııa Tóraǵasy, Qazaqstan Respýblıkasynyń Tuńǵysh Prezıdenti N.Nazarbaev Qasym-Jomart Toqaevty Prezıdentke úmitker retinde usyndy. Nursultan Ábishuly óz sózinde Qasym-Jomart Kemelulyn el Prezıdenti laýazymyna eń laıyq adam retinde sıpattaǵan bolatyn. Q.Toqaevtyń osy saılaýdaǵy jeńisi Elbasynyń danalyǵy men kóregendigine taǵy bir márte dálel boldy. Osy sátti paıdalanyp, Q.Toqaevty jeńisimen quttyqtap, sáttilik tileımin.
Osydan 20 jyl buryn Nursultan Nazarbaev meni Ýkraınaǵa Qazaqstan Respýblıkasynyń Tótenshe jáne ókiletti elshisi qyzmetine taǵaıyndaǵan edi. Sodan eldiń sol kezdegi Syrtqy ister mınıstri Qasym-Jomart Kemelulymen kezdestim. Keńsesinde AQSh-tyń burynǵy Memlekettik hatshysy, álemge áıgili dıplomat jáne saıasatker Genrı Kıssendjerdiń «Dıplomatııa» kitabyn kórdim. Avtor kitapqa «Mınıstr myrza, men Amerıkanyń negizin qalamadym, biraq siz baqyttysyz, siz – ózińizdiń uly memleketińizdiń negizin qalaǵandardyń birisiz. Qazaqstan da baqytty» dep jazypty. Menińshe, bul sózder kóp jaıttan habar beredi.
Biz bıliktiń demokratııalyq, beıbit, órkenıetti túrde aýysqanyna kýá boldyq. Tuńǵysh Prezıdent pen jańa Prezıdenttiń birlesip jospar quryp, el ıgiligi úshin birge qyzmet etýi – sırek kezdesetin jaǵdaı. Bul – «Qazaqstandyq noý-haý».
Ravıl ShYRDABAEV,
memleket jáne qoǵam qaıratkeri