Oral qalasynda «Tuǵyry bıik Táýelsizdik!» taqyrybymen ótken VIII «Altyn dombyra» respýblıkalyq aqyndar aıtysynyń bas júldesin aqyn Rústem Qaıyrtaıuly jeńip aldy.
Eki kúnge sozylǵan «Altyn dombyra» saıysynyń jeńimpazy altyn dombyraǵa qosa 4 mıllıon teńgeni ıelendi.
Sýperfınalda Rústemmen jekpe-jekke shyǵyp, kórermenderdiń qoldaýyna ıe bolǵan qyzylordalyq Muhtar Nııazov birinshi júldeni qanaǵat tutty. Aıta keteıik, Muhtar buǵan deıin «Altyn dombyra» júldesin eki márte jeńip alǵan.
Júldeli ekinshi oryn batysqazaqstandyq Jansaıa Mýsına men almatylyq Qaziret Berdihanǵa buıyrdy. Qostanaılyq Aıbek Qalıev pen qaraǵandylyq О́mirjan Kópbosynov úshinshi oryn ıesi atandy. Ásem Erejeqyzy (Nur-Sultan), Qanat Myrzahan (Almaty), Aspanbek Shuǵataev (Pavlodar) arnaıy júldege ıe boldy.
Aıtys mesenaty, «Tas Group» kompanııalar tobynyń jetekshisi Dýlat Tastekeev batysqazaqstandyq Baýyrjan Shırmedınulyna jalpy quny 2,4 mln teńgelik bir jyldyq stıpendııa taǵaıyndady. Sondaı-aq kásipker qaraǵandylyq Dıdar Qamıev pen oraldyq aqyn, osy aıtysty uıymdastyrýshylardyń biri Baýyrjan Halıollaǵa at mingizdi.