Túrkistan oblysynyń ár aýyl okrýginen aýyl sharýashylyǵy salasynda aldyńǵy qatarly tehnologııalardy qoldana otyryp, jylyna birneshe ret ónim alatyn taýar óndirýshiler tizimi bekitilgen.
Mysaly, Saıram aýdanynda búginde 100-den astam sharýashylyq 145,8 gektarǵa kartop, qyryqqabat, sábiz, pııaz, sarymsaq, nohat, qııar men tátti burysh ekken. Aýdanda 100-den astam shaǵyn jáne iri jylyjaı jumys isteıdi. Iаǵnı, elimizde jarııalanǵan tótenshe jaǵdaı dıqandar jumysyna kedergi keltirgen joq.
Saıram aýdanyna jumys saparymen kelgen oblys ákimi О́mirzaq Shókeev dıqandardyń tynys-tirshiligimen tanysty. Oblys basshysymen júzdesken sharýa qojalyqtary men jylyjaılardyń ıeleri óz máselesin ortaǵa saldy. О́mirzaq Estaıuly dıqandardy ótpeli kezeńniń qıyndyqtaryna tótep berip, alańdamaýǵa shaqyrdy. Kerisinshe, jumysty kúsheıtýdi tapsyrdy.
- Sharýalar nazardan tys qalmaıdy. Eldegi tótenshe jaǵdaıǵa baılanysty aýyl sharýashylyǵy salasynyń aqsaýyna jol berilmeıdi. Kerisinshe, qaıta jumysty kúsheıtý qajet. Memleket tarapynan qoldaý kórsetiledi. Qosymsha qajettilikter týyndap jatsa, qarastyrylady, - dedi oblys ákimi.
Aýyl sharýashylyǵy ónimderimen tolyq qamtamasyz etý maqsatynda sharýa qojalyq ıeleri egistik jerden eki-úsh ret ónim alýdy toqtatpaımyz dep otyr. Aýdandaǵy birneshe sharýa qojalyqtardyń jumysymen tanysqan oblys ákimi Qolkent aýyl okrýgindegi ınjenerlik - kommýnıkasııalyq júıeleriniń qurylysy nysanynda boldy. Mekeme aýyz sý, elektr jelisi, sý qubyry jobalaryn iske asyrady. Sondaı-aq О́mirzaq Shókeev aýdandaǵy quramajem shyǵaratyn zaýyttyń ujymymen kezdesti. Osyǵan deıin О́zbekstan, Aýǵanstan, Iran elderine eksport jasaıtyn óndiris orny josparǵa sáıkes jumys isteýde.
Túrkistan oblysy