Batys Qazaqstan oblysyna kórshiles jatqan Aqtóbe jáne Atyraý oblystarynan koronavırýs indeti tirkeldi. Osyǵan oraı Oralda saqtyq sharasy kúsheıtildi. Bul jóninde Oral qalasynyń ákimi Abat Shynybekov aıtyp berdi.
Elimizde tótenshe jaǵdaı jarııalanǵannan beri Oral qalasynda barlyq mádenı, sporttyq nysandar jumysy toqtatylsa, 27 naýryzdan bastap Oral qalalyq demalys saıabaǵy jabyldy. Oblys ortalyǵynda 221 saýda jáne qyzmet kórsetý ornynyń jumysy toqtatylǵan. Sondaı-aq qaladaǵy 54 sport alańdary da jabyq tur.
- Oral qalasy ákimdigi áleýmettik mańyzy bar azyq-túlik baǵalaryn alǵashqy kúnnen baqylap kelemiz. Búgingi tańda bazarlarda kartop baǵasy kılogramyna 120 teńgege turaqtady. Oblys boıynsha áleýmettik mańyzdy taýarlardyń shekti baǵasy belgilenýde. Keshe ǵana kóterme saýdamen aınalysýshy kásipkerler oblys ortalyǵyna 70 tonna qant jetkizdi. Memlekettik bıýdjetten de qarjy bólinip, «Aqjaıyq» áleýmettik kásipkerlik korporasııasy arqyly oblys turǵyndaryna qajetti qor jasaqtalyp jatyr. Dál qazir alańdaýǵa esh negiz joq, oblys aýmaǵynda birneshe aıǵa jetetin azyq-túlik qor bar, - deıdi Abat Shynybekov.
Oblys ortalyǵynda sanıtarlyq tazalyq sharalaryna erekshe mán berile bastady. Búginde «Jaıyq Taza qala» JShS Oraldaǵy 376 aıaldamaǵa dezınfeksııa jasaýǵa kiristi. Jolaýshy tasymalymen aınalysatyn 400-ge jýyq qoǵamdyq kólik ıeleri de ár aınalym saıyn júıeli dezınfeksııa jasaıdy. Sondaı-aq qalalyq páter ıeleri kooperatıvteri kóp qabatty úılerdiń kire berisi men jertólelerine sanıtarlyq dezınfeksııalyq sharalar jasaýǵa kiristi.
- Oral qalasynda kópqabatty 1234úı bar, olarǵa 107 PIK qyzmet kórsetedi. Ras, kóppáterli úı 334 PIK-ke birikpegen. Degenmen barlyq páter ıeleri kooperatıv basshylaryna, turǵynúı jetekshilerine eskertý berip, sanıtarlyq tazalyq sharalaryn jasaýǵa tapsyrdyq kúni búgin kóppáterli 598 turǵyn úıde dezınfeksııa jasalyp jatyr, - deıdi qala ákimi.
Abat Shynybekovtiń aıtýynsha, tótenshe jaǵdaı jarııalanǵaly beri qaladaǵy qoǵamdy kólik qyzmetin tutynýshy adam sany azaıǵan. Osyǵan baılanysty 28 marshrýtta avtobýs sany qysqarǵan eken. «Biraq bul jolaýshylarǵa qyzmet kórsetý sapasyna áser etpeıdi» dep sendirdi qala basshysy.
Oqýshylardyń kóktemgi kanıkýl ýaqyty aıaqtalýǵa taıaý. Tórtinshi toqsan qashyqtan oqytylatyny belgili boldy. Qazirdiń ózinde Oral qalasynda bilim salasynda qyzmet etetin 4176 qyzmetkerdiń 3200-i qashyqtan jumys isteıdi. Al 976 muǵalim aqyly demalysta. Oqý toqsan bastalǵanda Oral qalasynda 50 myńnan asa oqýshy qashyqtan oqýǵa kirispek.
Medısınalyq betperde tapshylyǵy barlyq jerdegi sııaqty Oral qalasynda da baıqalýda. Biraq búginde shahardaǵy kásiporyn-fabrıkalar, tigin ateleleri halyq suranysyn qanaǵattandyrý úshin betperde óndirisin jolǵa qoıyp jatyr. «Qazirdiń ózinde bizdiń tiginshiler kún saıyn 20 myńdaı betperde tige alady, bul kórsetkishti odan ári kóbeıtýge múmkindik bar» deıdi Abat Shynybekov.
«Aryq atqa qamshy aýyr» demekshi, tótenshe jaǵdaıdyń salqyny eń aldymen az qamtylǵan otbasylarǵa tıip ketýi múmkin. Sondyqtan áleýmettik ahýaly nashar shańyraqtarǵa erekshe nazar aýdarylady. Oral qalasy boıynsha 1367 otbasyna memlekettik ataýly áleýmettik kómek taǵaıyndalǵan. Odan bólek, jergilikti kásipkerlerdiń qoldaýymen 200-deı otbasyǵa azyq-túlik kómegi berilipti. 10 myńdaı betperde tigilip, qaıyrymdylyq esebinde taratylǵan.
- Koronavırýs indeti kún saıyn qanatyn jaıyp kele jatyr. Oraldyqtarǵa aıtarym, máselege baıypty qarap, jaýapkershilikti kúsheıtý qajet. Úıden shyqpaı, oqshaýlaný rejımin ustanaıyq, eń jaqyn adamdarymyzdy qaýip-qaterden saqtaıyq. Ásirese aıtarym, azyq-túlik, kúndelikti qajet nársemizdi alǵanda onlaın tólem aqysyna kóshýge shaqyramyn. О́ıtkeni, qolma-qol aqsha – ınfeksııa kózi. Qazir kez-kelgen saýda ortalyqtarynda, dúkenderde taýar aqysyn onlaın tóleýge múmkindik bar. Bizdiń kásipkerlerimiz de bul usynysty qoldaıdy dep oılaımyn, - dedi Abat Shynybekov qoshtasarda.
Batys Qazaqstan