Karantın bastalǵaly ánsheıinde úı betin kórmeıtin bala-shaǵa tórt qabyrǵanyń ishine qamalǵan. Besten jańa asqan Aıtýar qonaq bólmedegi dıvannyń jumsaq jaqtaýyn at qyp minip, quıǵytyp shaýyp barady.
Qala balasyna bári tańsyq. Áýeli álgi dıvannyń jumsaq jaqtaýyna attanar jaǵyna mingenine tań qaldym. Eshkim úıretpegen, atqa osylaı miný qajet ekendigi jóninde jón nusqamaǵan. Bálkim at ústinde ótken ata-babamyzdyń qanyndaǵy qasıet óz-ózinen darıtyn shyǵar. Qolyndaǵy ánsheıin ádemilik úshin istegen kishkentaı qamshymen dıvan-attyń saýyrynynan salyp-salyp qalyp, shý-shýlep qoıady.
Osy sátte oıyma shyn atqa mingizý túsken. Karantın bitken soń aýylǵa, úlken aǵaıdyń shańyraǵyna aparmaqpyn. Ol úıde minis, jýas attar bar. Tek ertoqym qaıdan tabylar eken. О́tkende bir áńgimeden áńgime týyndap, qazaqy ertoqymnyń qat ekendigin aıtyp otyrǵan.
– Bizdiki shyldyr shúmektiń jýandyǵyndaı temirmen qaýsyra qaptalǵan orys er toqymy ǵoı, – degen aǵam, – barbolǵyrdyń jaısyzdyǵy sondaı, attyń shoqtyǵyn alyp tastaıdy. Toqymyn qansha qalyń salsań da, temirdiń aty temir emes pe? Qazaqy jylqynyń turqyn kishireıtken osy orys ertoqymy ma dep oılaımyn keıde.
Kishkentaı bala jap-jalpaq ári eresen ebedeısiz orys ertoqymyna otyra almaýy múmkin. Boıyn bıleı almaı, qulap qalýy kádik. Endi ne isteý kerek. Sol sátte ashamaıdyń esime túskeni. Dál qazir ashamaıdy bizdiń óńirde bala túgil ata saqaly aýyzyna shyqqandar da bile bermeıdi. Ile indete izdedik, qyryq jyl jylqy baqqan Jetpis aǵataıym da bilmeıdi eken. Tipti estimegen:
– Ol ne, yrym ba? – dep suraıdy.
Ashamaı negizinde balany atqa minýge úıretý úshin paıdalanatyn ertoqymnyń eń qarapaıym túri. Er sııaqty aldyńǵy, artqy qastary, eki qaptaly bolady. Ádette úzeńginiń ornyna tebingige japsyryla tigilgen tepkishek tigiledi. Juqa, jumsaq bolǵan soń balanyń sıraǵyn jaralamaıdy. Ádemi bolýy úshin beti kóztartarlyqtaı etip kestelenedi. Ańǵarympaz balanyń ańǵal kóńilin aýlaý úshin qajet shyǵar. Aldyńǵy, artqy qasyna balanyń qoltyǵynyń astynan baılaıtyn aǵash bekitiledi. Qulap qalmaýy úshin. Ilki zamanda úsh jasqa tolysymen atqa ashamaı salyp úırete bastaǵan eken. Al bizdiki besten asyp ketti. Áli dıvannyń jaqtaýyn at qyp minip oınap otyr.
Osydan karantın bitsin dep, ishteı kijindim men. Aǵataıymnyń úıine, ıaǵnı, atasyna alyp baramyn. Ashamaılap atqa mingizemin. Bálkim, básirege bir taı atar. Qııal kókjıegi básirege jetkende ury oıdyń qylań bergeni. Taı atasa, qysqy soǵymnyń reti kep qalar. Biraq, esimdi jıyp álgi oıdan tez aınydym. Balanyń básiresine qııanat jasaǵanym uıat bolar.