Eýropa lıgasynyń alǵashqy irikteý kezeńinde «Qaırat» jeńiske jetse, «Ordabasy» jeńilis tapty.
Almatylyq «Qaırat» Ortalyq stadıonda armıannyń «Noa» komandasyn 4:1 esebimen oısyrata jeńip, Eýropa lıgasynyń ekinshi aınalymyna shyqty.
Oıynnyń segizinshi mınýtynda reseılik jartylaı qorǵaýshy Kırıll Bordyń arqasynda «Noa» kútpegen jerden alǵa shyqqanymen, «Qaırat» oıynshylary tez esin jıyp, araǵa tórt mınýt salyp Qyrǵyzstan ulttyq quramasynyń jartylaı qorǵaýshysy Gúljigit Alyqulov gol soqty. Esep – 1:1.
Esep teńeskennen keıin alańda belsendi bolǵan «Qaırat» oıynshylary birinshi taımnyń sońynda alǵa shyqty. 35 mınýtta 36 jastaǵy brazılııalyq shabýylshy Vagner Lav almatylyqtar sapynda alǵashqy golyn soqty.
Ekinshi taımda Lavtyń qanjyǵasy taǵy maılandy. 70 mınýtta Vagner esepti 3:1-ge jetkizse, 94 mınýtta Vagnerdiń sol qaptaldan asyrǵan dobyna birinshi bolyp baspen soqqy jasaǵan Eseola oıynnyń núktesin qoıdy. Qorytyndy esep – 4:1, «Qaırat» kelesi kezeńde!
«Qaırat» (Qazaqstan) – «Noa» (Armenııa) 4:1 (2:1)
Gol soqqandar: Bor, 8 – 0:1; Gúljigit Alyqulov, 12 – 1:1; Lav, 35 – 2:1; Lav, 70 – 3:1; Eseola, 94 – 4:1.
Dopty ıelik etý – 50% – 50%; soqqy – 15:11; dál soqqy – 9:3; buryshtama – 6:3; ofsaıd – 6:2; sary qaǵaz – 2:2; oıynshy almastyrý – 3:3.
Al «Ordabasy» bolsa, óz alańynda Rýmynııanyń «Botoshanı» komandasyna 1:2 esebimen jol berip, Eýropa lıgasy týrnırin erte aıaqtady. 12 mınýtta «Ordabasy» alǵa shyǵýǵa múmkindik aldy, biraq senegaldyq jartylaı qorǵaýshy Abdýllaı Dıakateniń 11 penaltıden múlt ketti. «Sen gol soqpasań, saǵan soǵady» degen fýtboldyń tanymal maqaly osy jerde taǵy bir ret eske tústi. Sebebi, oıynnyń 25 mınýtynda «Botoshanıdiń» avstrııalyq qorǵaýshysy Marsel Holsmann gol soǵyp, komandasyn alǵa shyǵardy. «Orda» 31 mınýtta esepti teńestirdi. Komanda oıynshylary ońtústik afrıkalyq jartylaı qorǵaýshy Meı Mahlangýdyń arqasynda bir jelpinip qalyp edi, araǵa eki mınýt salyp horvatııalyq shabýylshy Marko Dýgandjıch esepti 2:1 jetkizip, rýmynııalyqtardy kelesi kezeńge shyǵardy.
«Ordabasy» (Qazaqstan) – «Botoshanı» (Rýmynııa) 1:2 (1:2)
Gol soqqandar: Holsmann 25 – 0:1; Mahlangý, 31 – 1:1; Dýgandjıch, 33 – 1:2.
Dopty ıelik etý – 48% – 52%; soqqy – 15:10; dál soqqy – 3:4; buryshtama – 5:4; ofsaıd – 1:2; sary qaǵaz – 2:5; oıynshy almastyrý – 3:3.