Nur-Sultanda 1 qyrkúıekte birqatar jańa mektepter ashyldy: qoldanystaǵy bilim berý mekemeleriniń aýmaǵynda úsh mektep jáne úsh jańa ǵımarat salynǵan. Bul týraly Egemen.kz ákimdiktiń baspasóz qyzmetine silteme jasap habarlaıdy.
Eki aýysymdaǵy oryndardyń jalpy sany 9 myńdy quraıdy. Jańa bilim berý mekemeleri tórt mektepte – № 31, 40, 53, 85-te úsh aýysymda oqýdy alyp tastaýǵa múmkindik berdi. Sondaı-aq oqýshy sany kóp alty mekteptiń - No12, 58, 71, 75, 76, 84 júktemesin azaıtýǵa múmkindik berdi. Búgin elorda ákimi Altaı Kólginov birqatar jańa bilim berý mekemelerinde boldy.
"Bizdiń aldymyzda mektep oqýshylaryn orynmen qamtamasyz etý jáne oqýǵa qolaıly jaǵdaı jasaý mindeti tur. Saýran, 5/1, kóshesinde ornalasqan mektep eki aýysymda oqytyp, jańa 2400 oqýshyǵa oryn paıda boldy. Bul aımaq turǵyndary úshin buǵan deıin oqý orny bolǵan emes. Jańa mektep №59 jáne 85 mektepterdiń úsh aýysymdyq bilim berý máselesin sheship, №76 jáne 75 mektepterdiń júktemesin azaıtady. Mektep ınteraktıvti damý kabınetimen, qashyqtan oqytýǵa arnalǵan onlaın stýdııamen jabdyqtalǵan. Stýdııada muǵalimder onlaın sabaqtaryn jazyp, vebınarlar ótkizip, tikeleı efırde kórsete alady. Bolashaqta biz bul tájirıbeni basqa mektepterde de qoldanatyn bolamyz", – dedi elorda ákimi Altaı Kólginov.
Elorda ákimi sondaı-aq №8 IT mektep-lıseıinde boldy (Seıfýllın – Omarov k-si, eki aýysymda 1800 oryn). 60 jyl buryn salynǵan eski mektep ǵımaraty apatty dep tanyldy. О́tken jyldarda balalar №56 jáne 16 mektepterdiń ǵımarattarynda oqydy. Jańa mektep IT jáne STEM synyptarymen jabdyqtalǵan – oqýshylar 3D nysandaryn jasaý, robottardy modeldeý boıynsha ǵylymı jáne tehnıkalyq bilimderin praktıkada birden qoldana alady. Sonymen qatar mektepte ınklıýzııa jáne pedagogıkalyq-psıhologııalyq túzetý bólmeleri bar – arnaıy daıyndalǵan muǵalimder erekshe qajettilikteri bar balalarmen jumys isteıdi.
Bastaýysh synyp oqýshylary mektep qabyrǵasynda "kezekshi toptar" formatynda oqıdy – synypta 15-ten kóp bala bolmaıdy, partalar shahmat tártibimen qoılady. Dezınfeksııalyq týnnelder, antıseptıkter, áleýmettik araqashyq belgileri jáne maska taǵý týraly eskertýler ornatyldy.
Jalpy bıyl elordada 12 mektep salynyp, paıdalanýǵa beriledi, bul ótken jylmen salystyrǵanda eki ese kóp. Taǵy 12 mektep 2021 jyly salynady.