О́tinimder 25 qyrkúıekke deıin qabyldanady, dep habarlaıdy Egemen.kz elorda ákimdiginiń resmı saıtyna silteme jasap.
Nur-Sultanda volonterlik bastamalardy qoldaý boıynsha shaǵyn granttar baıqaýy bastaldy. Onyń aıasynda 22 jeńimpaz anyqtalyp, árqaısysyna 300 myń teńgeden beriledi.
Konkýrsqa 14-29 jas aralyǵyndaǵy jeke tulǵalarǵa, bastamashyl toptarǵa jáne Nur-Sultan qalasynyń úkimettik emes uıym múshelerine qatysý ruqsat etiledi. О́tinish jekeleı berilgen jaǵdaıda, ótinish berýshi 14 jastan joǵary bolýy tıis.
Bastamashyl toptyń atynan ótinish bergen jaǵdaıda, top jetekshisi men músheleri 14-29 jas aralyǵynda bolýy tıis. Baıqaýǵa qatysýǵa bastamashyl toptyń basshysy barlyq múshelerin kórsete otyryp, ótinimdi tikeleı berýge tıis.
"Jobalar kelesi baǵyttar boıynsha qabyldanady: ekologııalyq aǵartý jumystary boıynsha volonterlik jobalar; oqýshy, stýdent jastar men áleýmettik toptarǵa bilim berýge baǵyttalǵan jobalar; balalar jáne qarttar úıindegi adamdardy qoldaýǵa baǵyttalǵan jobalar; múmkindigi shekteýli adamdardy qoldaýǵa baǵyttalǵan jobalar; mádenı-tarıhı murany saqtaý jáne damytý, tarıhı eskertkishterdi, mádenı-memorıaldyq keshenderdi qalpyna keltirý jáne saqtaýǵa baǵyttalǵan jobalar; quqyq qorǵaý jáne tabıǵı, tehnogendi sıpattaǵy tótenshe jaǵdaılardyń aldyn alý boıynsha jobalar; ınnovasııalyq jobalar; ǵylymı jańalyqtar; kompıýterlik baǵdarlamalaý; ekspedısııalar men ekskýrsııalar uıymdastyrýǵa arnalǵan jobalar; áleýmettik mádenı jáne sporttyq jobalar; shyǵarmashylyq jáne qaıyrymdylyq is-sharalar; medısınalyq baǵyttaǵy jáne karantın kezinde iske asyrylatyn jobalar; ádebıet pen tilge qatysty jobalar; jastar belsendiligin damytýǵa arnalǵan jobalar; bapqa saı keletin basqa baǵyttar", – delingen konkýrs erejesinde.
Joba kelisimshartqa qol qoıylǵannan bastap 2 aı kóleminde (qazan-qarasha) júzege asyrylýy tıis. Karantın rejımi kúsheıtilgen jaǵdaıda jobalar onlaın/oflaın formatta júrgiziledi.
Sondaı-aq joba aıasynda eńbekaqy tóleýge, keńseniń qamtylýyna jáne basqa da ákimshilik shyǵyndarǵa jumsaýǵa bolmaıdy. Shyǵyndar volonterlik bastamalardy iske asyrý úshin túrli shyǵys materıaldaryna (jabdyqtaý, qural-saıman, qurylǵyny jalǵa alý jáne t.b.) jumsalady.
Baıqaýǵa qatysý úshin ótinimderdi PDF formatynda 2020 jyldyń 25 qyrkúıegine (18:00) deıin volonter_zhastar@bk.ru elektrondy pochtasyna jiberý qajet.
Grant ıegerlerin irikteý 2020 jyldyń 30 qyrkúıegine deıin júrgiziledi.
Irikteýdiń aıaqtalýy týraly habarlandyrý uıymdastyrýshylardyń resmı saıty www.adyrna.kz men @NS_JASTARY instagram paraqshacynda jarııalanady. Instagram: @ADYRNA.KZ/ @NS_JASTARY.
Aıta keteıik, konkýrs Nur-Sultan qalasynyń jastar saıasaty máseleleri basqarmasynyń tapsyrysymen "Volonterlik bastamalardy qoldaý boıynsha is-sharalar keshenin uıymdastyrý jáne ótkizý" jobasy aıasynda ótkizilýde. Uıymdastyrýshy – "Adyrna" ulttyq-etnografııalyq birlestigi. Barlyq suraqtar boıynsha joba úılestirýshisine + 7 (747) 933 91 09 telefon nómiri boıynsha habarlasýǵa bolady.