Búgin Nur-Sultan qalasynda "Úrker-2020" ulttyq syılyǵynyń ıegerleri anyqtalyp, Astana Media Week-tiń jabylý saltanaty ótti, dep habarlaıdy Egemen.kz
Saltanatty jıynda sóz bastaǵan Aqparat jáne qoǵamdyq damý mınıstri Aıda Balaeva bul marapattyń Astana Media Week jobasy aıasynda uıymdastyrylǵanyn atap ótti.
"Úsh kúnge sozylǵan Astana Media Week jobasy halyqaralyq jýrnalıstıkanyń nazaryn elordamyzǵa aýdarǵan erekshe is-shara boldy. Búginde búkil álemdi ábigerge salǵan pandemııa jaǵdaıynda álem jýrnalısteri bir arnada toǵysyp, óz kásipterine degen adaldyqty kezekti ret dáleldep otyr. Onlaın formattaǵy platformada álemniń 16 memleketiniń kórermenderi úshin 50-den astam halyqaralyq medıasarapshy tájirıbelerimen bólisti. Eń bastysy – bizdiń otandyq jýrnalıstıka deńgeıi de álemdik básekege qabilettiligine kóz jetkizdik", dedi mınıstr Aıda Balaeva.
Otandyq platforma AQSh, Ulybrıtanııa, Shvesııa, Saýd Arabııasy, RF sııaqty medıaalpaýyt memleketterdiń aqparat keńistigine shyǵyp, paıdaly kontentpen bólisti.
"Osyndaı ortaq alańǵa ózara tájirıbe almasyp, ozyq úlgilerdi úırený jýrnalıstıkanyń biliktiligin jetildirip, ony jańa deńgeıge kóteretini anyq. Sonyń ishinde otandyq medıa salasynda odan ári damýyna úlken serpin beredi dep senemiz. "Úrker" ulttyq báıgesiniń marapattaý rásimi Astana Media Week aptalyǵy aıasynda ótip otyr. Árıne, biz úshin qoǵamdaǵy ár salanyń ózindik orny bar. Jýrnalıstıkanyń qoǵam úshin atqaryp otyrǵan eńbegi óte zor. Árbir eńbek laıyqty baǵasyn alýy kerek dep sanaımyz. Bizdiń búgingi sharamyz da osy nıetpen ótkizilip otyr. Sondyqtan bizdiń ádil qazylar alqasy júzden júırik shyqqan shyn talanttarǵa laıyqty baǵasyn bergenine senimdimiz", dedi mınıstr.
Mınıstr osy jylǵy baıqaýdyń taǵy bir jańalyǵy – qazaq jýrnalıstıkasynyń aqtańgeri Sherhan Murtaza atyna arnaıy nomınasııa taǵaıyndalǵanyn tilge tıek etti.
"Sherhan aǵamyzdyń otandyq jýrnalıstıkany damytýda atqarǵan eńbegi men qosqan úlesi ólsheýsiz. Sondyqtan, qazaq jýrnalıstıkasynyń asqar shyńy sanalatyn Sheraǵa atyndaǵy marapatqa ıe bolý – kimge bolsyn zor mártebe, bıik jetistik dep bilemin", dedi Aıda Balaeva.
Esterińizge sala keteıik, atalǵan nomınasııa boıynsha júlde qoryn belgili jýrnalıst Qaınar Oljaı jeńip aldy.