Túrkistan oblysy Ordabasy aýdanynda jańa ınnovasııany qoldaný arqyly 60 gektarǵa "BS-Agro Product" JShS sýarýdy qajet etpeıtin "Sitrullus Lanatus" surypty qarbyz kóshetin otyrǵyzyp, 6,6 tonna ónim jınap alǵan. Dál osy qarbyzdyń dáni sheteldik kosmetologııa salasynda úlken suranysqa ıe. Seriktestik jınalǵan ónimdi Izraıl memleketine eksporttaýdy josparlaýda, dep habarlaıdy Egemen.kz
Aýdan ákimi Nurbol Turashbekovtiń málimetinshe, aýylsharýashylyǵy salasyndaǵy ónim kólemi 43 mlrd 175 mln teńge bolyp, ótken jyldyń tıisti kezeńimen salystyrǵanda 5 mlrd 371 myń teńgege artqan. Bıyldyń 10 aıynda aýyl sharýashylyǵy salasynda 5 mlrd 139 mln teńge kóleminde ınvestısııa tartyldy. Bul ótken jyldyń tıisti kezeńimen salystyrǵanda 1,6 esege kóp.
Aýdan boıynsha jalpy syıymdylyǵy 38050 tonna ónim jınaıtyn 16 qoıma bar. Sonymen qatar, bıyl Badam aýyl okrýginen "Aleksandrovskıı sad" JShS-niń jemis-jıdek ónimderin bastapqy óńdeýmen aınalysatyn syıymdylyǵy 1670 tonnalyq, quny 815 mln teńge bolatyn zamanaýı qoımany iske qosý kózdelýde.