Nur-Sultanda bala sany tym kóp mektepter sany 2 ese azaıdy. Mektepter júktemesin odan ári azaıtý úshin elordada jyl saıyn kem degende 10 bilim berý mekemesin salý qajet. Bul týraly OKQ-de ótken brıfıngte elorda ákimi Altaı Kólginov málimdedi, dep habarlaıdy Egemen.kz.
«Qalada halyq sanynyń ósýin eskere otyryp, áleýmettik nysandarǵa, onyń ishinde bilim berý mekemelerine júkteme artyp keledi. Eger 2019 jyly 6 mektep salynyp, paıdalanýǵa berilgen bolsa, bıyl eki ese kóp, ıaǵnı, 12 mektep. Olardyń keıbireýleri paıdalanýǵa berilgen. Mektepter salǵan kezde biz shaǵyn ólshemderden úlken ólshemderge aýysamyz. Sondaı-aq biz qazirdiń ózinde aldaǵy jyldary paıdalanýǵa beriletin mektepter salynýda. 2021 jyly biz kem degende 12 mekteptiń qurylysyn aıaqtap, paıdalanýǵa berýdi josparlap otyrmyz.
Eger qalanyń ózinde bilim berý mekemeleriniń júktemesinde problema týyndasa - bıyl biz úsh aýysymda oqıtyn mektepterdiń sanyn 8-den 4-ke, al shekten tys júktemesi bar mektepterdi 22-den 14-ke deıin azaıttyq. Mysaly, Mıchýrıno eldi mekeninde mektep oqýshylary men muǵalimderi mekemeniń shaǵyn kólemin eskere otyryp, mektepke beıimdelgen nysanda jumys istedi - sabaqtar úsh aýysymda ótetin. 1 jeltoqsanda biz jańa mektep ashtyq - oqýshylar keń, jaıly úsh qabatty ǵımaratta bilim alýda. Biz muǵalimderge turmystyq jaǵdaı jasaý úshin burynǵy úı-jaılardy jataqhanaǵa qaıta jabdyqtaýdy, balalarǵa arnalǵan úıirmeler ashýdy josparlap otyrmyz», - dedi elorda ákimi Altaı Kólginov.
5 jyldyq kezeńge arnalǵan keshendi jospar aıasynda 50-ge jýyq memlekettik mektep salý josparlanǵan. Sondaı-aq Nur-Sultan ákimi bilim berý mekemeleriniń qurylysyna jeke ınvestısııalar tartylatyndyǵyn, «tek bıýdjetke senýdiń qajeti joq, azamattar men qalaǵa qajetti jobalardy salýda jeke qarajatty belsendi túrde tartamyz» dep basa aıtty.