Aqtaýda dzıýdodan ótken el birinshiliginde ortalyq sport klýbynyń nusqaýshy sportshylary 5 medaldi enshiledi, dep habarlaıdy Egemen.kz.
Úzdikterdiń qatarynan kóriný úshin elimizdiń qurama komandalarynyń myqty sportshylary baq synasty. Jarysqa Qazaqstannyń barlyq oblysy men úsh qalasynan barlyǵy 273 adam qatysty.
Týrnırdiń qorytyndysy boıynsha armııa sportshylary arasynda efreıtor Ádil Orazbaev 100 kg astam salmaq dárejesinde altyn medalǵa ıe bolyp, respýblıka chempıony atandy.
Qazaqstan Qarýly Kúshteriniń qorjynyna kúmis júldeni leıtenant Ǵusman Qyrǵyzbav (66 kg) jáne efreıtor Erasyl Qajybaev (100 kg joǵary) saldy. Al Ádilet Mısın (90 kg) men leıtenant Ǵumar Qyrǵyzbaev (66 kg) qola júldeni qanjyǵasyna baılady.
«Jarys joǵary deńgeıde ótti. Bizdiń sportshylar laıyqty saıys kórsete bildi. Qazaqstan chempıonatynda ekinshi orynǵa ıe bolǵanyma ókinbeımin. Osy salmaq dárejesinde alǵash ret synǵa tústim. Fınalda aǵam Ǵumarǵa qarsy kúresemin dep oıladym, biraq ol jartylaı fınalda jeńilip, úshinshi orynǵa taban tiredi. Chempıonatty qorytyndylap, kelesi jyldyń qańtarynda jańa maýsymǵa daıyndalý josparda bar», - dep óz oıymen bólisti armııa sportshysy Ǵusman Qyrǵyzbaev.