Bıyl Nur-Sultan qalasynda jańadan 40 myń oqýshy orny qurylady. Bul týraly elorda ákimi Altaı Kólginov aıtty, dep habarlaıdy Egemen.kz
Búgin elorda ákimi Altaı Kólginov qalany aralaý barysynda birqatar jańa mektepke (№60 mektep-lıseı, №40 mektep-lıseı, №31 mektep-gımnazııa) baryp, tapsyrma berdi. Bıyl 2020 jylmen salystyrǵanda eki ese kóp oqýshy orny qurylady.
«Bilim berý sapasyna nazar aýdarý jáne ol úshin jaǵdaı jasaý óte mańyzdy. Halyqtyń ósýin jáne úsh aýysymdy, tyǵyzdyǵy joǵary mektepterdi qysqartý qajettiligin eskere otyryp, jyl saıyn elordada keminde 10 mektep salý qajet. О́tken jyly 12 mektep salyndy. Bul, aldyńǵy jylmen salystyrǵanda eki ese kóp. Bıyl oqýshylarǵa arnalǵan oryn sanyn taǵy eki esege arttyramyz. Bul – 20 myń oqýshy orny, eki aýysymda 40 myń oqýshy oqıtyn bolady», dedi ákim.
№60 mektep-lıseıi (Saryarqa aýdany) eki ǵımarattan turady jáne 2400 orynǵa eseptelgen (eki aýysymda 4800). Munda 5 myńnan astam oqýshy oqıdy. Mektep aýmaǵyna qosymsha ǵımarat turǵyzylyp, onda eki aýysymda 1100 bala oqyp jatyr.
№40 mektep-lıseıi (Saryarqa aýdany) 17 jyl buryn salynǵan. Jobalyq qýattylyǵy – 850 oryn (eki aýysymda – 1700). Al munda 2 myńǵa jýyq oqýshy oqıdy. Atalǵan mektep aýmaǵynda 1 myń orynǵa (eki aýysymda) arnalǵan taǵy bir tolyqqandy ǵımarat salyndy. Osylaısha, úsh aýysymdy oqytý máselesi sheshilgen.
A.Kólginov atalǵan mektepti jylytý qazandyǵynan ortalyq jylý júıesine aýystyrýdy tapsyrdym. Bul, bir jylda mektepti jylytýǵa ketetin 100 mln teńgeni únemdeýge múmkindik bermek.
Sondaı-aq qala ákimi 45 jyl buryn salynǵan № 31 mektep-gımnazııasynda (Baıqońyr aýdany) boldy. Munda 2700-den astam oqýshy bilim alady. 1400 oryndyq jańa ǵımarat esebinen úsh aýysymda oqytý máselesi sheshildi. Mekteptiń eski ǵımaratyn kúrdeli jóndeýden ótkizý tapsyryldy.
«Prezıdenttiń tapsyrmasy boıynsha mektepterdi salý jáne jóndeý jumystaryn aldaǵy jyldary da jalǵastyratyn bolamyz», dedi Altaı Kólginov.
Búginde elordada úsh aýysymda oqytatyn mektepter sany 8-den 4-ke deıin, al tyǵyzdyǵy joǵary mektepter sany 22-den 14-ke deıin azaıdy. Birqatar jańa mektep boı kóterýde, olardyń arasynda jeke ınvestısııalar esebinen salynyp jatqandar bar. Keshendi jospar aıasynda 5 jyldyq kezeńge 50-ge jýyq memlekettik mektep salý josparlanǵan. Sondaı-aq, Memleket basshysy Q.Toqaev barǵan №23 orta mekteptiń (О́ndiris turǵyn alaby) aýmaǵynda bes qabatty mekteptiń qurylysy júrgizilip jatyr.