Basty maqsat – Qazaqstandy qýatty elge aınaldyrý

Keshendi reformalar jalǵasa beredi

«Bes jylǵa jýyq ýaqytta Parla­ment qabyrǵasynda 410 zań qabyl­dandy. Depýtattar ózderiniń zańǵa bas­tamashylyq etý quqyǵyn paıdalanyp, 60-qa jýyq zań jobasyn daıyndady. Bul – osyǵan deıingi bes shaqyrylym depýtattarynyń bastamalaryn qosa alǵannan da kóp. Jańa depýtattar aldyńǵy áriptesteriniń osy qarqynyn saqtaı otyryp, anaǵurlym jemisti jumys isteýi qajet.

Sebebi bárimizdi zor mindetter men aýqymdy ister kútip tur. Quramy jań­ǵyr­ǵan jańa Májilistiń qyzmetke kirisýi eli­miz úshin sımvoldyq máni bar eki oqı­ǵamen tuspa-tus keledi. Biz qasterli Táýel­sizdigimizdiń 30 jyldyq mereıli mejesine qadam bastyq.

Sondaı-aq qazirgi zamanǵy Qazaqstan parlamentarızmi shırek ǵasyrlyq beles­ke jetti. Osy tarıhı kezeńde senim mandatyna ıe bolǵan depýtattar el úmitin aqtap, Otanymyzǵa adal qyzmet etedi dep kámil senemin.

О́tken saılaý elimiz úshin damýdyń jańa paraǵyn ashty. Osy mańyzdy oqıǵa memlekettiligimizdiń tuǵyry berik ekenin taǵy bir márte dáleldedi. Qazaqstan qoǵa­mynyń joǵary saıası mádenıetin jáne azamattyq kemeldigin tanytty. Barlyq óńirdegi daýys berý nátıjesi memlekettiń strategııalyq baǵdaryn halqymyz jappaı qoldaıtynyn baıqatty.

Biz bolashaqqa senimmen bet alý úshin qajetti alǵysharttardy birge jasadyq. Saıası ustanymdarymyz ártúrli bolsa da, mindetimiz – bir. Bárimizdiń ortaq maqsatymyz – Qazaqstandy qýatty elge aınaldyrý», dedi Qasym-Jomart Toqaev.

Prezıdent Májilis pen barlyq deń­geıdegi máslıhattardyń kóp partııaly jańa quramy qoǵamdaǵy saıası básekeniń artqanyn kórsetetinine nazar aýdardy. Sondaı-aq halyqtyń belgili bir bóliginiń múddesin kózdeıtin basqa da partııalar senim mandatyna ıe bolǵanyn jetkizdi.

Osy oraıda egemendiktiń tórtinshi onjyldyǵyna qadam basar tusta el-jurtymyz buryn-sońdy kezdespegen jańa syn-qaterlermen betpe-bet kel­ge­nine toqtaldy. О́ıtkeni dúnıe júzi múlde jańa dáýirge bet burdy. О́rkenıettiń damý joly men álemdik qury­­lymnyń túp negizi túbegeıli ózge­riske ushyraı bastady.

«Keleshekte synaqtar men syn-qater­ler az bolmaıdy. Degenmen bar­ly­ǵy­myzdyń eń basty mindetimiz – pan­de­mııanyń saldaryn eńserý. HHI ǵasyrdyń jıyrma birinshi jyly barsha adamzat úshin betburys kezeńine aınalmaq. Bul jyl aldaǵy onjyldyqtyń basty baǵdaryn aıqyndaıdy. Mundaı kúrdeli jaǵdaıda ýaqyttan utylýǵa jáne bir sátke de bosańsýǵa bolmaıdy.

Jyldyń basynda saılaý ótkizý ar­qy­ly qıyndyqtarmen kúresip qana qoı­maı, jańǵyrýǵa jol ashyp, jańa ser­pinge ıe boldyq. Osy qarqyndy saqtap, baǵdarymyzdan jańylmaý óte mańyzdy.

Sondyqtan Táýelsizdiktiń 30 jyl­dyǵynda keshendi reformalar júrgi­ziletin bolady. Barlyq kúsh-jigerimizdi tıimdi memleket pen ádiletti qoǵam qurýǵa jumyldyrýymyz kerek. Basty basymdyq – halyqtyń turmys sapasyn jaqsartyp, ál-aýqatyn arttyrý.

Jurt jasandy jetistikterdi emes, kózben kórip, qolmen ustaıtyn naqty nátıjeni kútedi. Halyq ekonomıkalyq jáne áleýmettik baǵdarlamalardyń jemisti bolǵanyn qalaıdy. Biz osy maq­sattaǵy aýqymdy jumystarǵa barlyq belsendi azamattardy tartamyz. Olardyń árqaısysy el taǵdyryna áser etetin sheshimderdi qabyldaýǵa ózderi tikeleı qatysatynyn bilgeni jón. Ortaq iske úles qosyp jatqanyn sezinýi mańyzdy.

Men usynǵan «Halyq únine qulaq asatyn memleket» tujyrymdamasynyń máni osynda. Biz ulttyń jasampazdyq áleýetin paıdalanǵan jaǵdaıda ǵana alǵa basyp, tabysqa jete alamyz.  Reformalardy sapaly zańdar arqyly júrgizý – uzaq merzimdi jetistikke jetýdiń basty sharty. Men jańarǵan depýtattyq korpýs ózine júktelgen bul mindetterdi abyroımen atqarady dep senemin», dedi Prezıdent.

Memleket basshysy atap ótkendeı, Qa­zaq­stannyń strategııalyq baǵdary – aıqyn. Basty maqsat – ozyq damyǵan elderdiń qataryna qosylý. Q.Toqaev damyǵan eldiń uǵymy eń aldymen deni saý, bilimdi jáne baqýatty jurtty qamtı­ty­nyn atap ótti. Sondyq­tan memlekettiń bas­ty mindeti – azamat­tary­myzdyń to­lyqqandy damýyna, ál-aý­qatynyń artýyna jáne jaıly turmysyna jaǵdaı jasaý.

Osyǵan baılanysty 2025 jyl­ǵa qaraı árbir azamat úshin tıimdi ınstı­tý­sıonaldyq jáne ınfraqu­ry­lym­dyq orta qalyptastyrý kózdelip otyr. Qazaqstannyń uzaq merzimdi damýy Sa­baqtastyq, Ádildik jáne О́rleý qaǵı­dat­taryna negizdeledi. Atalǵan maqsatqa qol jetkizý úshin birqatar basymdyqqa mán berilmek.

 

«Birinshi. Biz quqyqtyq memleketti damytý jáne azamattardyń bılik organdaryna senimin nyǵaıtý úshin bar kúsh-jigerimizdi jumsaýymyz kerek. Bul – óte ózekti mindet. Soǵan oraı memlekettik basqarýdyń jańa mo­delin engizý aıryqsha mańyzdy. Osy baǵyt­taǵy reformalar júıeni baıyppen orta­lyq­syzdandyrýdy, memlekettik apparatty jańǵyrtýdy, kvazımemlekettik sektordy ońtaılandyrýdy jáne barlyq úderisti sıfrlandyrýdy qamtıdy. Sol arqyly memlekettik apparat barynsha yqsham, ashyq ári tıimdi, al sheshim qabyldaý úderisi ıkemdi jáne aıqyn bolady.

Azamattardyń quqyqtary laıyqty qorǵalmasa, áleýmettik-ekonomıkalyq turǵydan damý múmkin emes. Bul – aksıoma, aqıqat. Osy oraıda sot júıesiniń táýel­sizdigin nyǵaıta túsý úshin reformany sońyna deıin jetkizýimiz kerek. Memleket tarapynan qolǵa alynǵan sharalarǵa jáne Joǵarǵy sot Tóraǵasynyń tikeleı ózi kúsh salyp jatqanyna qaramastan, sot korpýsynyń sapasyna qatysty áli de túıtkilder bar.

Sot júıesi jabyq korporasııa bol­maý­ǵa tıis. Sondyqtan sot korpýsyn edáýir jańartyp, oǵan túrli quqyq salalarynyń mamandaryn tartý kerek. Úmitkerlerdi iriktegen kezde olardyń kásibı táji­rı­besimen qatar, jeke qasıetterin de eskergen abzal. Bul jumys buqaralyq aqparat qu­raldarynda ashyq kórsetilýge tıis. Son­daı-aq sot qyzmeti týraly aqparat qoǵam úshin neǵurlym qoljetimdi bolǵany jón.

Quqyq qorǵaý organdarynyń jumysyn da barynsha ózgertý qajet. Bul másele jóninde Joldaýymda naqty aıttym. Biz azamattarmen ózara qarym-qatynastyń servıstik modelin engizemiz. Qoǵamdyq qaýipsizdik jańa sıfrly tehnologııalardy qoldaný arqyly qamtamasyz etiledi.

Parlament zań ústemdigi, adal báse­ke jáne jekemenshikti qorǵaý qaǵıdat­tarynyń quqyqtyq negizin nyǵaıta túsýi kerek. Sonda bul qaǵıdattar múltiksiz oryndalatyn bolady. Búginde birqatar zańnamalyq usynys boıynsha jumys istelip jatyr. Degenmen, áli de kóptegen tyń bastama kóterip, zańdar qabyldaý qajet», dedi Memleket basshysy.

 

Májiliske ótý shegi 5 paıyz bolady

Prezıdent ekinshi basymdyq retinde kúshti jáne ınklıýzıvti qoǵam qurýdyń negizgi quraly tıimdi áleýmettik saıasat ekenin aıtty. Sonymen qatar álem «bilim ekonomıkasyna» qaraı jyljyp bara jatqanyn atap ótti.

«Sońǵy jyldary bilim berý sala­syn reformalaýda ilgerileý bar. So­ny­men qatar osyǵan deıin qordalanyp qalǵan birqatar máseleni sheshý qajet. Ártúrli áleýmettik toptar men aımaqtar arasyndaǵy bilim berý sapasyndaǵy alshaqtyqty azaıtý – mańyzdy mindet. Bul rette qaıta oqytý jáne qyzmetkerlerdiń biliktiligin turaqty túrde jetildirý bo­ıynsha jańa saıasat qajet. Osy maqsatta arnaıy ulttyq joba ázirlep, iske asyrý kerek», dedi Prezıdent.

Memleket basshysy otandyq densaýlyq saqtaý salasyn jańǵyrtý jumysynyń asa mańyzdy ekenine toqtaldy. Bul má­se­leniń, ásirese pandemııa jaǵdaıynda anyq baıqalǵanyn aıtty. Qasym-Jomart Toqaev áleýmettik qamsyzdandyrý saıasa­tyn qaıta jańǵyrtyp, memleket kómekke muqtaj azamattardy qoldaýǵa basymdyq berýi tıis ekenin jetkizdi. Áleýmettik ınfraqurylymnyń negizgi baǵyttarynyń biri – otandyq zeınetaqy júıesi. Mem­leket basshysy atalǵan júıeniń ádiletti, turaqty, halyqtyń múddesine saı qurylýy qajet ekenin atap ótti.

Ulttyq ekonomıka turaqty damymaı, halyqtyń ál-aýqatyn arttyrý múm­kin emes. Prezıdent belgilegen basym­dyq­tyń biri osy. Memleket basshysy Úki­­metke ekonomıkalyq belsendilikti qol­­daýǵa baǵyttalǵan kontrsıkldy mak­roekonomıkalyq saıasatty jalǵas­ty­rý­dy tapsyrdy. Sondaı-aq bızneske qo­laı­ly jaǵdaı qalyptastyrýdy mindet­tedi.

«Eńbek naryǵynyń tez ózgerýin eskere otyryp, jumys kúshiniń ónimdiligi tómen sektorlardy ekonomıkanyń neǵurlym ónimdi baǵyttaryna bet burýyn qoldaý qajet. Buǵan deıin aıtqanymdaı, elimizdiń ónerkásibi ıkemdi jáne qazirgi ózgeristerge beıim bolýy kerek», dedi Qasym-Jomart Toqaev.

Aýmaq pen keńistik turǵysynan eli­mizdiń teńgerimdi damýy basty basym­dyq­tyń biri. Bul rette barlyq óńirlerdi bir­tutas ekonomıkalyq keńistik arqyly baılanystyratyn asa mańyzdy salalardy damytýǵa basa nazar aýdarylady. Atap aıtqanda,  kóliktik, energetıkalyq jáne sıfrly ınfraqurylymdarǵa basymdyq berilmek.

«О́ńirlerdi, qalalardy, aýdandar men aýyldardy ózara baılanystyratyn ınfra­qurylymdy jaqsartýǵa basymdyq beriledi. Jańa standarttarǵa sáıkes 3500-den astam aýyldy jańǵyrtamyz. Aı­nalasyndaǵy eldi mekenderdiń tiregi sanalatyn árbir aýylǵa baratyn joldar men respýblıkalyq mańyzy bar kúre joldar 100 paıyz jóndeledi.

Jergilikti ózin ózi basqarýdy ári qaraı jetildirý úshin bıýdjettik rásim­derdi jeńildetip, ókildi jáne atqarýshy organ­dardyń derbestigin arttyrý mańyzdy. Osy oraıda men máslıhat depýtattaryna myna máseleni basa aıtqym keledi. Siz­derdiń belsendi ustanymdaryńyz saılaý­shylardyń múddesin qorǵaıtyn sapaly ári salmaqty sheshimder qabyldaýǵa yqpal etýi kerek. Qolǵa alynǵan ózgeristerdiń jedel jáne tabysty júzege asýy jergilikti jerdegi jumystyń tıimdiligine tikeleı baılanysty», dedi Q.Toqaev.

Qazaqstandaǵy reformalardyń basty baǵytynyń biri – saıası jańǵyrý. Pre­zıdent bıyl jekelegen aýyldyq okrýg­terde saılaý ótetinin málimdedi.

«Taǵy bir mańyzdy qadam – aýyl ákim­derin saılaý. Bıyl jekelegen aýyldyq ok­rýgterde saılaý ótedi. Biz jergilikti ózin ózi basqarý júıesin eń tómennen bas­tap nyǵaıtýdy kózdep otyrmyz. Bul – óte mańyzdy másele. Sondyqtan aldaǵy ýaqytta aýyl ákimderin saılaǵannan keıin aýdan ákimderin saılaýǵa kóshýge bolady.

Alaıda munymen de shektelip qal­maýy­myz kerek. Saıası júıeni ornyq­tyryp, sheshim qabyldaý úderisine aza­mat­tardyń yqpal etýin kúsheıte túsý úshin tyń serpin qajet. Bul baǵytta reformalardyń ekinshi bóligin ázirleý barysynda aýqymdy jumystar jasaldy. Onda barlyq partııalardyń, sonyń ishinde keshe Parlamentke ótpeı qalǵan saıası kúshterdiń de usynystary eskerildi jáne bolashaqta da nazarymyzda bolady. Ulttyq keńes músheleriniń jáne basqa da bedeldi sarapshylar men belsendi aza­mat­tardyń ıdeıalary, bastamalary qamtylyp otyr.

Biz osy jolǵy saılaý naýqany karantın shekteýlerine qaramastan qanshalyqty qyzý ótkenine kýá boldyq. Keıbir par­tııa­lardyń Májilis pen máslıhattarǵa ótýine sál ǵana daýys jetpeı qaldy. Olardyń árqaısysynda belgili bir salany jetik meńgergen, bilimdi, bilikti azamattar da bar. Solar Parlamenttiń bıik minberinen aıtylýǵa tıis kóptegen ózekti máseleni der kezinde ári oryndy kóterip júr.

Osyndaı partııalardyń ókilderi Parlamentke ótse, ondaǵy pikirtalasty qyzdyra túser edi, ortaq jumysqa tıimdi bolar edi. Olar zań shyǵarý jumysynyń sapasyn arttyrýǵa da súbeli úles qosary anyq. Sondyqtan saıası partııalardyń Májiliske ótý shegin 7-den 5 paıyzǵa tómendetýimiz kerek. Osyndaı sheshimdi qabyldaıtyn ýaqyt keldi, óıtkeni atalǵan norma zań júzinde tirkelgen partııalardy aldaǵy saılaýlarǵa qatysýǵa yntalandyrady», dedi Memleket basshysy.

Prezıdent mundaı qadam eldegi saıası básekeniń damýyna septigin tıgizetinin atap ótti. Bul bastama memlekettik saıa­sat­ty júrgizý úshin halyqtyń pikirin neǵur­lym kóbirek qamtyp, eskerip oty­rýǵa múmkindik bermek. Soǵan sáıkes bo­lashaqta partııa músheleriniń tizimin jáne soǵan qatysty basqa da rásimderdi onlaın formatta jasaýǵa múmkindik bar. Q.Toqaev osy maqsatta elektrondy úkimettiń múm­kindikterin paıdalanýdy usyndy.

«Parlamenttiń zań shyǵarýmen qatar baqylaý fýnksııasy da bar ekenin bi­le­sizder. Onyń tıimdiligi halyqaralyq táji­rıbede dáleldengen. Osy asa mańyzdy quzy­retti tıimdi paıdalaný qazirgi zaman­ǵy Qazaqstan parlamentarızminiń ınstı­tý­sıonaldyq negizin edáýir ornyqtyrady. Bul meniń «Kúshti Prezıdent – yqpaldy Parlament – jaýapty Úkimet» dep atalatyn saıası formýlammen úndesip jatyr. Depýtattar halyqtyń múddesin is júzinde qorǵap, árdaıym tabandylyq tanytýǵa tıis», dedi Prezıdent.

Memleket basshysy azamattyq qoǵam ókilderiniń belsendiligin arttyrý, jastar saıasatyn jetildirý jáne qaıyrymdylyq qyzmetin qoldaý máselelerin de udaıy nazarda ustaý qajettigin aıtty.

«О́zderińiz bilesizder, jyl basynda men keıbir zańnamalyq aktilerge qo­ǵam­dyq keńester qyzmeti máseleleri boıynsha ózgerister men tolyqtyrýlar engizý týraly tıisti zańǵa qol qoıdym. Sol arqyly qoǵamdyq keńesterdiń ókilettigin edáýir kúsheıttik.

Endi, azamattyq belsendilikti arttyrý jolynda taǵy bir mańyzdy qadam jasalady. Bul – talqylanyp jatqan «Qoǵamdyq baqylaý týraly» zań. Biz onlaın-petısııa ıns­tıtýtyn da zań júzinde resimdeýimiz kerek. Bul bastamalardyń maqsaty – memleket qyzmetiniń tıimdiligin arttyrý, she­shim qabyldaýǵa azamattyq qoǵamdy tartý.

Memlekettik jastar saıasaty sala­syn­daǵy zańnamany jetildirý – negizgi min­dettiń biri. Úkimet 2020 jyly Jas­tar­dy qoldaý jóninde keshendi jospar qabyldady. «Táýelsizdik urpaqtary» atty ulttyq joba, memlekettik jastar saıasaty jáne volonterlik qyzmet týraly zańdar daıyndalyp jatyr.

Depýtattar «jastardyń áleýmettik qyzmetteri» degen uǵymdy zań júzinde resimdeýi kerek. Álemdik tájirıbege sáı­kes Qazaqstanda «Jastardyń damý ın­dek­sin» engizgen jón. Jergilikti atqarý or­gan­darynyń jastar saıasatyn júzege asy­rýǵa qatysty jumysy sonyń negizinde baǵalanady.

Qaıyrymdylyq qyzmetin júıeli qoldaý máselesi de basty basymdyq bolyp otyr. Bul saladaǵy yntalandyrý sharalary qarapaıym ári naqty bolýy kerek. Soǵan sáıkes qaıyrymdylyq sharalaryna jáne volonterlik jobalarǵa atsalysatyn bıznes ókilderi men jeke tulǵalarǵa túrli jeńildikter berilýge tıis», dedi Q.Toqaev.

 

Adam quqyqtary tolyq qorǵalýy tıis

Memleket basshysy adam quqyqtaryn tolyq qorǵaý memlekettiń basty maq­saty­nyń biri bolyp qala beretinin atap ótti. Bul rette azamattardyń tańdaý erkindigin barynsha qamtamasyz etý óte mańyzdy.

«Bizdiń basty maqsatymyzdyń biri – adam quqyqtaryn tolyq qorǵaý. Bul rette azamattardyń tańdaý erkindigin barynsha qamtamasyz etý óte mańyzdy. Álemdik tájirıbede adamnyń qandaı da bir saılaýǵa kelispeıtinin nemese úmit­kerlerdiń bárine qarsy ekenin zańdy túrde bildirý quqyǵy keńinen qalyptasqan.

Shyn máninde, balamaly pikir jáne bá­rine qarsy daýys berý uǵymy biz úshin de qa­lypty nárse bolýǵa tıis. Sondyqtan bar­lyq deńgeıdegi saılaý bıýlletenderine «bá­rine qarsymyn» degen jazý engizgen jón. Bul bastama azamattardyń saılaý qu­qy­ǵyn qorǵaýǵa jaǵdaı jasaıdy. Tańdaýy joqtyǵyn resmı kórsetýdiń ózi tańdaý emes pe?!

Taǵy bir másele – adam quqyǵyn qorǵaý salasy dáıekti túrde jetildirilýge tıis. Ony ınstıtýsıonaldyq jáne uıym­dastyrý jaǵynan nyǵaıta túsýimiz qajet. Mysaly, bizde ombýdsmen ınstıtýty bar. Biraq ol ázirge óziniń áleýetin tolyq kórsete almaı otyr. Sondyqtan jaqyn arada Ombýdsmen týraly arnaýly zań qabyldaýymyz kerek.

Bul zań atalǵan ınstıtýttyń qyz­metin barlyq baǵyttar boıynsha ret­teıdi.  Tıisti mamandar bolmasa jáne uıym­das­tyrý jumystary jasalmasa, ombýds­men qyzmetin zańnamalyq turǵydan qam­tamasyz etý qıynǵa soǵady.

Adam quqyqtaryna baılanysty ne­gizgi máseleler óńirlerde baıqalyp otyr. Jergilikti bıliktiń ústinen aryz-sha­ǵymdar kóp túsedi. Sondyqtan ombýds­men ınstıtýtyn, eń aldymen, aımaqtarda kú­sheıtý qajet. Adam quqyǵy jónindegi ýákildiń apparatyn nyǵaıtýymyz kerek.

Sonymen qatar biz bala quqyqtaryn qorǵaý jónindegi aýqymdy máselelerdi sheshýge tıispiz. Balalardyń qaýipsizdigin qamtamasyz etý, balalar arasyndaǵy sýısıd pen býllıngtiń aldyn alý úshin mem­le­kettik baqylaýdy kúsheıtip, tıimdi tetikterdi qarastyrǵan jón. Erek­she kú­timge muqtaj balalardyń ınklıý­zıvti da­mýy máselesin nazardan tys qaldyr­maýy­myz kerek.

Bilim berý mekemelerindegi tıisti qyzmetterdiń tıimdiligin arttyrý úshin nor­matıvtik baza qalyptastyrý – kezek kút­tirmeıtin máseleniń biri. Áleýmettik ma­ńyzy joǵary osyndaı máselelerdi she­shý memlekettik organdardyń ǵana mindeti emes. Oǵan búkil azamattyq qoǵamnyń atsalysýy qajet ekenin bárimiz túsinýge tıispiz», dedi Q.Toqaev.

Prezıdent usynylǵan bastamalar qazir kún tártibinde turǵan uzaq mer­zimdi áleýmettik-ekonomıkalyq, saıası refor­malardyń bir bóligi ǵana ekenin aıtty. Depýtattar bul jumysqa belsene qaty­syp, Úkimetpen syndarly qarym-qatynas ornatýy qajet dep sanaıtynyn jetkizdi.

«Usynylǵan bastamalar – qazir kún tártibinde turǵan uzaq merzimdi áleýmettik-ekonomıkalyq, saıası reformalardyń bir bóligi ǵana. Onyń kóptegen baǵyty bo­ıynsha qajetti zań jobalary talqylanyp jatyr. Depýtattar bul jumysqa belsene qatysyp, Úkimetpen syndarly qarym-qatynas ornatýy qajet dep sanaımyn.

Meniń negizgi ustanymym – qoǵamdaǵy bar­lyq ózekti máseleler, eń aldymen, Par­­­lamentte talqylanýǵa tıis.  Qoǵam ókil­­deri men sarapshylar zań jobalaryn da­ıyn­­daý isine barynsha atsalysýy kerek. Aza­mattardyń narazylyǵyn týǵyzýy múm­­­kin daýly máseleler boıynsha tıimdi keri baılanys ornatý – basty talaptyń biri.

Parlamenttiń aldynda mańyzdy eki mindet tur. Bul – sapaly zańdar qabyldaý jáne ózekti máselelerdiń sheshimin tabatyn ortalyqqa aınalý. Jalpy, elimizdiń zańnama júıesin keshendi túrde jetildirý kerek. Zań normalaryn ázirleý barysynda bireýlerdiń jeke múddesine bola lobbı jasaýdy túp-tamyrymen joıý qajet. Sizder, eń aldymen, saılaýshylardyń suranysyn basshylyqqa alyp, táýekel men qaterdiń bárin de saralaýǵa tıissizder. Depýtattar árdaıym qoǵam tynysyn ańǵaryp, tamyryn dóp basa bilgeni jón», dedi Memleket basshysy.

Qasym-Jomart Toqaev Parlament – el múddesi úshin aıanbaı qyzmet etetin qaı­naǵan jumys ortasy dedi. Sonymen qatar depýtattarǵa halqymyzdyń oń ózgerister kútetinin árdaıym este ustaǵan abzal ekenin aıtyp, sheshim qabyldaý kezinde asqan jaýapkershilik tanytýǵa shaqyrdy.

 

Raýan QABIDOLDA,

Abaı ASANKELDIULY,

«Egemen Qazaqstan»