Erteńnen bastap azamattar júrgizýshi kýáligi men kólikti tirkeý qujatyn ózderimen alyp júrmese de bolady. Tıisti zańǵa Memleket basshysy 1-shi aqpanda qol qoıǵan bolatyn. Qujat erteń kúshine enedi.
Jol saqshylary júrgizýshiniń jeke kýáligi arqyly barlyq málimetterdi elektrondy bazadan teksere alady. Atalǵan qujattar bolmasa da, ákimshilik aıyppul salynbaıdy.
- «Jol júrisi týraly» Zańnyń 54-babynan júrgizýshi kýáligi men tehpasportty kórsetý mindeti alynyp tastaldy. Qabyldanǵan túzetýler sheteldik memlekettik nómirleri bar avtomashınalarǵa, sondaı-aq Qazaqstannan tys jerlerde júrgizýshi kýáligin alǵan adamdarǵa qatysty emes. Olar úshin júrgizýshi kýáligin jáne tehpasportty kórsetý mindetti bolyp qalady, - dedi Qyzylorda OPD Ákimshilik polısııa basqarmasynyń bastyǵy Nurmahan Pazylov.
Budan bólek, Qazaqstanda 10 jyldan asqan avtobýstardy bastapqy tirkeýge tyıym salynbaq. Jańa norma 2022 jylǵy 1 qańtardan bastap engiziledi. Bul ózgeris júrgizýshi ornynan basqa 8 oryndyqtan asatyn avtobýstardyń barlyǵyna ortaq.