Búgin, 13 aqpanda «Qazaqstan Respýblıkasynyń keıbir zańnamalyq aktilerine jol júrisi máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańy kúshine endi, dep habarlaıdy Egemen.kz
Avtoáýesqoılarǵa ózderimen birge júrgizýshi men kólik quralyn tirkeý kýálikterin alyp júrmeýge bolady. Osy qujattardyń joqtyǵy úshin azamattar ákimshilik jaýapkershilikke tartylmaıdy. Júrgizýshiler ózimen birge jeke basyn kýálandyratyn qujattyń túpnusqasyn alyp júrýi tıis.
Ishki ister mınıstri Erlan Turǵymbaev atap ótkendeı, júrgizýshilerdiń ózimen birge bul qujattardy alyp júrý jáne júrgizýshi qujattaryn kórsetý mindetin alyp tastaý – bul zamanaýı tehnologııalyq «servıstik» polısııany damytýǵa baǵyttalǵan taǵy bir qadam.
Quqyq qorǵaý organdarynyń qyzmetkerleri avtomobıldiń tıesiligin aqparattyq júıeler arqyly tekseredi. Qyzmettik planshetterde «ákimshilik óndiristerdiń biryńǵaı tizilimi» baǵdarlamasy ornatylǵan, onda júrgizýshi men avtokólik týraly barlyq derekter: avtokólik quraly kimge tıesili ekeni, qandaı quqyq buzýshylyqtar tirkelgeni, tehnıkalyq baıqaýdan ótken-ótpegeni jáne saqtandyrý polısi resimdelgeni týraly derekter bolady. Búginde patrýldik polısııanyń saptyq bólimshelerinde osyndaı 8 649 planshet bar.
Jeke basty kýálandyratyn qujattarǵa Qazaqstan Respýblıkasy azamatynyń pasporty, jeke kýálik, azamattyǵy joq adamnyń kýáligi jatady. Stýdenttik bılet, qyzmettik kýálik bul tizimge kirmeıdi.
Budan basqa, qabyldanǵan túzetýlerdiń sheteldik nómirleri bar avtomashınalarǵa, sondaı-aq Qazaqstannan tys jerlerde júrgizý quqyǵyna kýálik alǵan júrgizýshilerge qatysy joq. Olar júrgizý kezinde júrgizýshi kýáligin jáne kólik quralyn tirkeý kýáligin kórsetýge mindetti.
IIM basshysy Erlan Turǵymbaev: «Memleket kólikti basqarýdy aıtarlyqtaı jeńildetti, biraq júrgizýshiler jol qozǵalysynyń basqa qatysýshylarynyń qaýipsizdigi úshin óz jaýapkershiligin este saqtaǵany abzal», dep atap ótti.