Elorda ákimi Instagram paraqshasynda balalardy qosymsha bilimmen qamtý jumystary qalaı júrgizilip jatqany týraly aıtty, dep habarlaıdy Egemen.kz.
«Sapaly bilim berý men oqýshylardyń jan-jaqty damýy úshin mektepterdi salyp, olardy jóndeýden basqa, qosymsha bilim berýdi damytýǵa erekshe nazar aýdarý qajet. Memleket basshysynyń tapsyrmasyna sáıkes balalardy qosymsha bilimmen barynsha qamtý boıynsha jumystar júrgizilip jatyr. Balalardyń sporttyq, shyǵarmashylyq jáne zııatkerlik áleýetin iske asyrýy mańyzdy.
Búgin birqatar kópbeıindi qosymsha bilim berý ortalyqtarynyń jumys barysymen tanystym. Onyń ishinde Jeleznodorojnyı eldi mekenindegi ornalasqan tehnıkalyq shyǵarmashylyq ortalyǵy bar. Ǵımarat buryn bos tursa, qazir jóndelip, qosymsha bilim beretin ortalyqqa aınaldy (J.Jabaev kóshesi, 27). Atalmysh qosymsha bilim berý ortalyǵynda robototehnıkamen, avıamodeldeýmen, tehnıkalyq dızaınmen, qolónermen, motokrospen jáne t. b. aınalysý úshin barlyq jaǵdaı jasalǵan. Ortalyqtyń 30-dan astam fılıaly jumys isteıdi. Olar qala ishinde de, eldi mekenderde de ornalasqan. 7 jastan 18 jasqa deıingi balalar ortalyqqa tegin bara alady», dep jazdy elorda ákimi.
Sonymen qatar M.О́temisov atyndaǵy Oqýshylar saraıynda bolyp, jumysymen tanysqanyn, (Á.Mámbetov kóshesi, 1). munda kúrdeli jóndeý jumystary júrgizilip, qosymsha úıirmeler ashylǵanyn aıtty.
«Kórkem jáne áleýmettik shyǵarmashylyqty, dene shynyqtyrý men sportty damytý úshin barlyq jaǵdaı jasalǵan. Ortalyqta lıngvıstıka, dombyra, shahmat, toǵyzqumalaq, robototehnıka, vıdeografıka, sport seksııalary (basseın, basketbol) jáne t. b. kabınetter bar.
Balalardy qosymsha bilimmen qamtýda aýla klýbtary da kómektesedi. Búginde Nur-Sultanda 28 aýla klýby jumys istep tur, al olardyń tárbıelenýshileriniń sany shamamen 3 myń balany quraıdy.
Eger mektep qurylysy týraly aıtatyn bolsaq, bıyl 16 iri mektep salamyz. Olar bıyl 40 myńnan astam jańa oqýshy ornyn qurýǵa múmkindik beredi. Bul ótken jylmen salystyrǵanda 2 ese kóp.
Keshendi jospar aıasynda bes jyl ishinde 50-ge jýyq memlekettik mektep salamyz. Sondaı-aq mektep qurylysyna jeke ınvestısııalar tartamyz. Investısııalyq keńesterde 30-dan astam jekemenshik oqý oryndarynyń qurylysy qoldandy.
Bıyl qosymsha jańa Oqýshylar saraıy ǵımaratynyń qurylysyn bastaımyz», dep jazdy elorda ákimi.