Qaraǵandyda Gogol kóshesindegi kópqabatty úıde jarylys boldy. Apat saldarynan bir adam qaza tapty, dep habarlaıdy Egemen.kz.
Oqıǵa 1 maýsym kúni jergilikti ýaqyt boıynsha 19.57-de bolǵan. Turǵyndar oqıǵa ornyna birden qutqarýshylardy shaqyrǵan. Kýágerlerdiń aıtýynsha, jarylys gaz ballonynan bolýy múmkin.
Qaraǵandy oblysy TJD baspasóz qyzmeti oqıǵaǵa túsinikteme berdi. Vedomstvo habaryna qaraǵanda, úıde gaz-aýa qospasy jarylǵan.
«Bes qabatty turǵyn úıdiń eki bólmeli páterinde gaz-aýa qospasy jarylǵan, biraq ol órtke aınalmady. Oqıǵa saldarynan úıdiń tireýish qurylymdary zaqymdalmaǵan, tek páterdiń bólmeleri zaqymdanǵan», dedi vedomstvo ókilderi.
Oqıǵa ornynda qutqarýshylar qaza bolǵan adamdy tapty. Onyń jeke basy áli anyqtalǵan joq. Turǵyn úıdiń basqa páterlerinen 10 adam evakýasııalanǵan.