Aqmolalyq polıseıler óńir aýmaǵynan tabylǵan mınalardy zalalsyzdandyrdy, dep habarlaıdy Egemen.kz Aqmola oblystyq PD baspasóz qyzmetine silteme jasap.
1 maýsymda Jarqaıyń aýdandyq PB kezekshilik bólimine jergilikti polısııa qyzmeti bóliminiń ýchaskelik ınspektorynan telefon habarlamasy túsken.
«Qazba jumystary júrgizilip jatqan burynǵy áskerı núkteniń aýmaǵynda ýchaskelik ınspektor áskerı mınaǵa uqsas sılındr pishindi metall zattardy tapty. Oqıǵa ornyna jedel-tergeý toby, Aqmola oblysy PD oqý-jattyǵý vzvodynyń qyzmetkerleri shaqyryldy. Snarıadtardy anyqtaý aýmaǵy dereý qorshaldy. Tekserý barysynda mamandar ballıstıkalyq zymyrandarǵa arnalǵan eski shahtalardan KSRO-nyń tankke qarsy tórt mınasyn anyqtady. Jalpy, mınalar óte tozǵan, tattanǵan jáne mehanıkalyq isten shyqqan», dedi vedomstvodan.
Alaıda, muqııat tekserý kezinde eki mınadan jarylǵysh zat tabylyp, olardy tasymaldaý qaýp týǵyzdy. Sol sebepti, bul mınalar sol jerde zalalsyzdandyryldy. Taǵy eki snarıad ári qaraı saraptamalyq zertteýge jiberildi.