QR Premer-Mınıstri Asqar Mamın Atyraý oblysyna jumys sapary aıasynda munaı-gaz hımııasy jáne munaı-gaz mashınasyn jasaý salalaryndaǵy iri ınvestısııalyq jobalardyń iske asyrylý barysyn tekserdi, dep habarlaıdy Egemen.kz.
Úkimet basshysy Qashaǵan ken ornynda gazdy keshendi daıyndaý qondyrǵysy – gaz óńdeý zaýytynyń qurylysyn bastap berdi.
Kásiporynnyń óńdeý qýaty jylyna 1 mlrd m³ deıin shıki kúkirtti gazdy quraıdy, odan 815 mln m³ taýarlyq gaz jáne 119 myń tonna suıytylǵan gaz, 212 myń tonna kúkirt jáne 35 myń tonna gaz kondensaty óndiriletin bolady. Ony 2023 jylǵy 4 toqsanda paıdalanýǵa berý kózdelgen.
Joba elimizdiń gaz óńdeý salasyn damytýǵa serpin beredi, Qashaǵanda munaı óndirý deńgeıin táýligine 450 myń barrelge deıin ulǵaıtýǵa, eldi odan ári gazdandyrý úshin resýrstyq bazany keńeıtýge jáne munaı-gaz óndirisiniń ekologııalyǵyn arttyrýǵa múmkindik beredi. Qurylys kezeńinde munda 2500 deıin ýaqytsha, al paıdalaný kezeńinde 600 turaqty jumys orny qurylady.
Premer-Mınıstr jylyna 500 myń tonna polıpropılen óndiretin Qazaqstandaǵy alǵashqy Integrasııalanǵan gaz-hımııa kesheniniń qurylys barysyn tekserdi. Jobany «Qazaqstan Petrokemıkal Indastrız (KPI)» JShS júzege asyrady. Investısııalardyń jalpy kólemi $2,6 mlrd quraıdy. Ony 2022 jylǵy naýryz aıynda paıdalanýǵa berý josparlanǵan. Kásiporynda 630-dan astam turaqty jumys orny ashylady. Qazirgi ýaqytta joba kestesi boıynsha jalpy progress 87,19%-dy quraıdy. Qurylysqa 39 qosalqy merdiger kompanııa tartylǵan, onyń 36-sy — qazaqstandyq. Úkimet basshysy bıyl sáýir aıynda Polıpropılen óndiretin ıntegrasııalanǵan gaz-hımııa kesheniniń jumysyn qamtamasyz etý úshin azot jáne syǵylǵan qurǵaq aýa shyǵaratyn qondyrǵysynyń qurylysyn aıaqtaǵan «Er Lıkıd Qarabatan Teh Gazy» Qazaqstan-Fransýz birlesken kásipornyna bardy. Zaýyttyń qýattylyǵy 8 myń nm3/s azot jáne 8,1 myń nm3/s syǵylǵan qurǵaq aýany quraıdy.
A. Mamın 2020 jylǵy tamyzda paıdalanýǵa berilgen qýaty jylyna 36 myń m² greıtıng jáne 60 myń tonna myryshtaýdy quraıtyn «Atyraýmunaımash» JShS greıtıng jáne ystyqtaı myryshtaý sehynyń jumysymen tanysty. «Kaspıı munaı» JShS aralaý barysynda Premer-Mınıstrge Atyraý oblysynyń Jylyoı aýdanyndaǵy «Aırankól» ken ornyn 2019-2021 jyldary júrgizilgen sıfrlandyrýdyń nátıjeleri tanystyryldy – munaı óndirý 10%-ǵa artty, shyǵyndar 30%-ǵa azaıdy, operasııalyq qyzmet 80%-ǵa jetildirildi, munaı qaldyqtarynyń kólemi qysqartyldy, pandemııa kezeńinde ken ornyn qashyqtan baqylaý jáne basqarý múmkindigi engizildi.
Sapar barysynda Úkimet basshysy bekire balyǵyn ósiretin «Kaspi Bekiresi Limited» balyq ósirý sharýashylyǵynyń qyzmetimen tanysty. Qysqa merzimdi kezeńde kásiporynnyń óndiris kólemin jylyna 30 tonna balyq eti men 3 tonna ýyldyryqqa deıin jetkizý josparlanýda.
Premer-Mınıstrge sondaı-aq Atyraý qalasynyń tynys-tirshiligin qamtamasyz etý ınfraqurylymyn damytý týraly baıandaldy. Jumys saparyna Atyraý oblysynyń ákimi Mahambet Dosmuhambetov, QR Prezıdentiniń kómekshisi Qanat Bozymbaev, energetıka mınıstri Nurlan Noǵaev, ındýstrııa jáne ınfraqurylymdyq damý mınıstri Beıbit Atamqulov, ekologııa, geologııa jáne tabıǵı resýrstar mınıstri Maǵzum Myrzaǵalıev, «Samuryq-Qazyna» AQ basqarma tóraǵasy Almasadam Sátqalıev, «QazTransGaz» AQ basqarma tóraǵasy Qaırat Sháripbaev, «Báıterek» UBH» AQ basqarma tóraǵasy Aıdar Áriphanov, «Qazaqstannyń Damý Banki» AQ basqarma tóraǵasy Abaı Sarqulov jáne t. b. qatysty.