«Bolashaq» halyqaralyq stıpendııasyn taǵaıyndaý konkýrsyna qujat qabyldaý júrip jatyr. Qazirgi tańda 1000-nan astam ótinish berildi. Bul týraly «Halyqaralyq baǵdarlamalar ortalyǵy» AQ habarlady, dep jazady Egemen.kz.
Eske salaıyq, qujattardy qabyldaý 4 mamyrda bastaldy jáne 2021 jyldyń 28 qazanyna deıin jalǵasady.
Shákirtaqy taǵaıyndaý úsh kezeńnen turady: maýsym, tamyz jáne qarasha. Ekinshi kezeń kvotasy 250 stıpendııa, al úshinshi kezeńdiki - 205 stıpendııa.
2021 jyly «Bolashaq» baǵdarlamasy boıynsha oqýǵa 1055 stıpendııa bólindi. Onyń ishinde 555 stıpendııa magıstratýraǵa, rezıdentýraǵa, doktorantýraǵa jáne ınternatýraǵa bólinedi.
«Ǵalymdar» taǵylymdamasynyń jańa sanaty boıynsha 500 stıpendııa taǵaıyndalady. Esterińizge sala keteıik, QR Prezıdenti Qasym-Jomart Toqaevtyń tapsyrmasymens jyl saıyn 500 ǵalymǵa álemniń jetekshi ǵylymı ortalyqtarynda taǵylymdamadan ótýge múmkindik berý maqsatynda qurylǵan.
Qujattardy qabyldaý jáne «Bolashaq» halyqaralyq stıpendııasyn taǵaıyndaý úshin konkýrstyq irikteý prosesi tolyq avtomattandyrylǵan jáne eGov.kz memlekettik qyzmetter portaly arqyly júzege asyrylady.
Aıta keterligi, 2021 jyly «Bolashaq» baǵdarlamasy boıynsha basym mamandyqtar tiziminde akademııalyq daıyndyq boıynsha 80 mamandyq jáne tájirıbeden ótý úshin 137 mamandyq qarastyrylǵan. Tizimge «Inklıýzıvti bilim», «Vırýsologııa», «Ýrbanıstıka», «Jańa materıaldar tehnologııasy» sııaqty mamandyqtar engen.
Bıyl «Innovasııa jáne jańa tehnologııalar», «О́nerkásiptik ınjenerııa», «Jaratylystaný», «Áleýmettik ǵylymdar», «Bilim», «Medısına» jáne «Shyǵarmashylyq ındýstrııa» sııaqty baǵyttar basymdyqqa ıe.