2021 jyldyń birinshi jartyjyldyǵynyń qorytyndysy boıynsha 23 mlrd teńge jeke menshiktegi múlik salyǵy tólenbegen. Bul týraly Qarjy mınıstrliginiń Memlekettik kirister komıteti habarlady, dep jazady Egemen.kz.
Kólik salyǵy boıynsha jalpy bereshek somasy 21,5 mlrd teńgeni qurady, onyń ishinde negizgi somasy – 17,5 mlrd teńge, ósimpuldar – 3,9 mlrd teńge.
263 802 jeke tulǵanyń múlik salyǵy boıynsha bereshek 1,1 mlrd teńgeni qurady, onyń ishinde negizgi somasy – 877,1 mln teńge, ósimpuldar - 269,9 mln teńge.
Sonymen qatar, 261 801 jeke tulǵanyń jer salyǵy boıynsha qaryzy 409,5 mln teńgeni qurady, onyń ishinde negizgi somasy –282,7 mln teńge, ósimpuldar - 126,8 mln teńge.
Salyq zańnamasy keshiktirgen árbir kún úshin ósimpul esepteýdi qarastyrady, al aıyppuldardy qoldaný zańda kózdelmegen.
«Salyq mindettemesi oryndalmaǵan jaǵdaıda, salyq organdary bereshekti májbúrlep óndirip alýdy qamtamasyz etý úshin zańnamada kózdelgen ádisterdi qoldanýǵa mindetti.
Bul rette salyq zańnamasy bankterdiń tólenbegen qaryzy bar zańdy tulǵa, jeke kásipker, jeke tulǵalarǵa shot ashýdan bas tartý mindettemesin kózdeıdi», dep jazady vedomstvo.
Bul ereje memlekettik bıýdjetten jáne Memlekettik áleýmettik saqtandyrý qorynan tólenetin járdemaqylar men áleýmettik tólemderdi alýǵa arnalǵan banktik shottarǵa, bilim berý jınaq salymy sharty boıynsha banktik shottarǵa qoldanylmaıdy. Eger jeke tulǵa bank shotyn osy maqsatta ashsa, onyń salyq bereshegi bolsa da, bank bas tartýǵa quqyly emes.
Budan basqa, Salyq kodeksine 1 AEK-ten artyq mólsherdegi salyq tólenbegen jaǵdaıda, habarlama jiberiledi. Sodan bastap otyz jumys kúni ishinde bereshek tólenbese, salyq organy sáıkes buıryq shyǵaryp, aımaqtyq jeke sot oryndaýshylar palatasyna nemese ádilet organdaryna májbúrlep oryndaý úshin jiberedi.