Osy jyldyń naýryzynda keme alty kún boıy arnany tolyǵymen jaýyp tastaǵan bolatyn, dep jazady Egemen.kz.
Egypt Today-diń habarlaýynsha, álemdegi eń iri konteınerlik kemelerdiń biri Ever Given Rotterdamnan qaıtyp kele jatyr. 20 tamyzda Sýes kanaly arqyly ótýi kerek. Kanal boıyndaǵy jol 10-12 saǵatty alady.
Bul joly 400 metrlik keme taǵy da baǵytynan jańylyp, qystyrylyp qalmaýy úshin kanal boıymen eki býksırmen alyp júredi.
2021 jyly 23 naýryzda Ever Given kemesi Sýes kanalynyń ońtústik bóliginde qystyrylyp qalyp, alty kún boıy kanaldy tolyǵymen jaýyp qaldy. Saldarynan 400-den astam keme ýaqytynan keshikti. Bul jaǵdaı túrli kompanııalarǵa úlken shyǵyn ákeldi. Sýes kanaly ákimshiliginiń málimeti boıynsha, «keptelistiń» saldarynan Mysyr kúndelikti 14 mıllıon dollarǵa jýyq shyǵynǵa batqan.
Mysyrdyń ekonomıkalyq soty kemeni keltirilgen zalaldyń ornyn jáne qutqarý operasııasynyń qunyn ótegenge deıin qamaýǵa alý týraly sheshim shyǵardy. 7 shildede keme kanaldan shyǵyp, Sýes kanaly ákimshiligi men keme ıesi bitimgershilik kelisimge kelgennen keıin Rotterdamǵa qaraı bet aldy.