Ishki ister mınıstriniń orynbasary Murat Baımuqashev Jaýǵashty aýylyndaǵy áıelder kolonııasyna bardy, dep habarlaıdy Egemen.kz.
«Qylmystyq-atqarý júıesin reformalaý aıasynda Ishki ister mınıstriniń orynbasary Murat Baımuqashev ombýdsmen Elvıra Azımovamen, sondaı-aq basqa da áleýmettik belsendilermen birge Almaty oblysyndaǵy LA-155/4 áıelder kolonııasynda boldy. Ishki ister mınıstrligi bastyǵynyń orynbasary mekemedegi áıelder men olardyń «Bala úıinde» jatqan nárestelerin ustaý sharttarymen, medısınalyq kómekpen, sondaı-aq kolonııa aýmaǵynda óndiristiń damýymen tanysty», dedi IIM baspasóz hatshysy Nurdildá Oraz departamentte ótken brıfıngte.
LA-155/4 mekemesi - 3 jasqa deıingi balalardy anasynan ajyratpaý úshin «Bala úıi» jumys isteıtin Qazaqstandaǵy jalǵyz kolonııa. Qazirgi ýaqytta balalar úıinde 31 bala tárbıelenip jatyr, olardyń 11-i bıyl týǵan.
«Adam quqyqtary salasyndaǵy sarapshylar bala 3 jasqa tolǵannan keıin de anasymen birge bolý merzimin uzartý máselesin qarap jatyr. Bul shara eýropalyq elderinde qoldanylady. Eger bala úsh jasqa tolǵan kezde anasynyń qalǵan jaza merzimi 1 jyldan aspasa, balany janynda ustaýǵa ruqsat beriledi. Bul balany anasynan erte ajyratpaýǵa múmkindik beredi, bul ekeýiniń de emosıonaldy jaǵdaıyna jaqsy áser etedi», dedi N.Oraz.
Ishki ister mınıstrliginiń orynbasary sottalǵandar úshin jumys ornyn ulǵaıtý mańyzdy ekenin aıtty.
«Eńbek-Jaýǵashty» RMK fılıaly jumys isteıtin kolonııanyń óndiristik bóliginde boldym, onda sottalǵandardyń shamamen 64%-y jumyspen qamtylǵan. Jumystyń negizgi bóligi tigin óndirisine baǵyttalǵan, munda ortasha eseppen jylyna 230 myńǵa jýyq ónim shyǵarylady. Qazir biz sottalǵandardyń, onyń ishinde áıelder kolonııasynyń formasyn ózgertý týraly usynysty qarastyryp jatyrmyz. Jańa kıimderdi shyǵarý mekeme aýmaǵyndaǵy tigin sheberhanalaryna júkteledi», dedi Murat Baımuqashev.