Mınıstrliktiń ortalyq apparatynyń jedel-tergeý toby Jambyl oblysynda bolǵan jarylysty tekserip, kýágerlerden jaýap alyp jatyr. Bul týraly brıfıngte vedomstvonyń resmı ókili Nurdilda Oraz habarlady, dep jazady Egemen.kz.
«Jambyl oblysyndaǵy áskerı bólimniń aýmaǵynda bolǵan jarylystardy tolyq jáne obektıvti tekserý úshin IIM ortalyq apparatynyń tájirıbeli qyzmetkerleriniń arasynan jedel-tergeý toby quryldy.
Tergeý QR Qylmystyq kodeksiniń 462-babynyń 3-bóligi boıynsha júrip jatyr», dedi N.Oraz.
Onyń aıtýynsha, jedel-izdestirý sharalary, onyń ishinde jábirlenýshiler men kýágerlerden jaýap alý, sondaı-aq zaqymdalǵan obektilerdi tekserý júrip jatyr.
«Tıisti sot-medısınalyq saraptamalar taǵaıyndaldy. Oqıǵa ornynda saperler men kınologtar brıgadasy izdestirý júrgizip júr. Qazirgi ýaqytta 15 áskerı qyzmetshi men qutqarýshynyń máıiti tabyldy», dep qosty IIM resmı ókili.
Mınıstrliktiń málimetinshe, qoǵamdyq tártipti saqtaýǵa jáne oqıǵanyń saldaryn joıýǵa 800-den astam polısııa qyzmetkeri men Ulttyq ulannyń sarbazdary, 113 arnaıy tehnıka jumyldyryldy.
Polısııa oqıǵa ornyna kirý joldaryn, onyń ishinde temirjoldy ýaqytsha jaýyp tastady jáne oqıǵa ornyna jedel járdemdi birge alyp júrdi. Tótenshe jaǵdaı aımaǵyna jaqyn jerde Qaınar, Jibek joly, Úshbulaq eldi mekenderinen 700-den astam adam evakýasııalandy, 2350 poıyz jolaýshysyn avtobýspen tasymaldaý uıymdastyryldy, turǵyndar arasynda túsindirý jumystary júrgizildi.
«Baızaq aýylynyń №4 lıseıinde jergilikti atqarýshy, quqyq qorǵaý jáne basqa da memlekettik organdardyń qatysýymen jedel shtab quryldy. Qoǵamdyq tártipti saqtaý úshin Ulttyq ulan men polıseıler táýlik boıy kezekshilik etedi. Oqıǵa ornynda jaǵdaı turaqty jáne quqyq qorǵaý organdarynyń baqylaýynda», dedi Nurdildá Oraz.