IýNKTAD-tyń Investısııalar jónindegi dúnıejúzilik baıandamasy: Qazaqstan ótpeli ekonomıkasy bar elder arasynda taza TShI ósý qarqyny boıynsha birinshi orynda, dep jazady Egemen.kz.
«COVID-19 pandemııasynyń álem ekonomıkasyna teris áserine qaramastan, 2020 jyldyń qorytyndysy boıynsha Qazaqstan ótpeli ekonomıkasy bar 17 eldiń jáne teńizge shyǵa almaıtyn 34 eldiń ishinde taza tikeleı sheteldik ınvestısııalar (TShI) kóleminiń eń joǵarǵy ósimin kórsetti», dep jazady QR Syrtqy siter mınıstrliginiń baspasóz qyzmeti.
Búkil álemde olardyń jalpy kóleminiń 2005 jyldan beri eń tómengi kórsetkishke deıin úshten birge qysqarýy aıasynda Qazaqstanda ótken jylǵa qaraǵanda taza TShI 34,9%-ǵa kóp tartyldy. Mundaı derekter BUU Saýda jáne damý jónindegi konferensııasynyń (IýNKTAD) «Investısııalar jónindegi dúnıejúzilik baıandamasynda» kórsetilgen.
Pandemııadan týyndaǵan ekonomıkalyq daǵdarys álemdegi halyqaralyq saýda-ekonomıkalyq qatynastardyń qurylymyna aıtarlyqtaı ózgeris engizdi. Bul TShI aǵymynda da kórinis tapty.
Baıandamaǵa sáıkes, ótken jyly jahandyq ekonomıkadaǵy taza TShI kólemi 35%-ǵa qysqaryp, jalpy alǵanda 1 trln AQSh dollaryn qurady. Bul sońǵy 16 jyldaǵy eń tómengi kórsetkish.
Koronavırýs daǵdarysy bul turǵyda ótpeli ekonomıkasy bar elderge qatty teris áserin tıgizdi. IýNKTAD sarapshylarynyń boljamy boıynsha, atalǵan elder tobyndaǵy TShI aǵynyn qalpyna keltirý tek 2022 jyly múmkin bolady.
IýNKTAD derekteri boıynsha, QR Úkimetiniń qurylymdyq reforma júrgizýiniń jáne ınvestısııalar tartý salasynda iske asyryp jatqan saıasatynyń arqasynda Qazaqstanda ótpeli ekonomıkasy bar elder men teńizge shyǵa almaıtyn elder arasynda taza TShI aǵynynyń edáýir óskeni atap ótildi. Atalǵan ósim óńdeý ónerkásibi, kólik, telekommýnıkasııa, qarjy qyzmeti, energetıka, taý-ken óndirý kesheni jáne t.b. salalardaǵy ınvestısııalar esebinen qamtamasyz etildi.
О́tpeli ekonomıkasy bar elderge taza TShI aǵynynyń jalpy kólemi ótken jyly 24 mlrd AQSh dollary, Qazaqstanda 3,9 mlrd AQSh dollaryn qurady. Bul kórsetkish tek Reseı Federasııasynda ǵana joǵary.
Osyndaı reıtıng teńizge shyǵa almaıtyn elder arasynda da jasaldy, olardyń arasynda tikeleı ınvestısııalardyń taza aǵyny 15,4 mlrd AQSh dollardy qurady. Atalǵan elder tobynda taza TShI kólemi boıynsha Qazaqstan 1-orynǵa ıe boldy.
«IýNKTAD baıandamasynyń derekteri pandemııanyń jahandyq ekonomıkaǵa teris áseri aıasynda Qazaqstanda sheteldik ınvestorlar úshin qolaıly jaǵdaı saqtalyp otyrǵanyn kórsetedi. Eldiń halyqaralyq reıtıngterdegi turaqty joǵary pozısııasy, sondaı-aq TShI tartý statıstıkasy Qazaqstannyń joǵary ınvestısııalyq tartymdylyǵyn, ınvestorlardyń tipti daǵdarys kezeńinde de jobalardy iske asyrýdy bastaýǵa jáne jalǵastyrýǵa degen yntasyn rastaıdy», dep jazylǵan habarlamada.
IýNKTAD sarapshylarynyń boljamy boıynsha 2021 jyly tikeleı sheteldik ınvestısııalar aǵynynyń ósýi álem boıynsha orta eseppen 10-15%-dy jáne damýshy elderde 5-20%-dy quraıdy.