Bir aptadan astam ýaqyt boıy Úndistannyń soltústigindegi Ýttar-Pradesh shtatynda balalardyń dene qyzýy kóterilip jatyr. Kópshiligi býyndaǵy aýyrsyný, bas aýrýy, shóldeý jáne júrek aınýyna shaǵymdanǵan. Keıbiriniń aıaq-qolyna bórtpe shyqqan, dep jazady Egemen.kz.
VVS jazýynsha kem degende 50 adam bezgekten qaıtys boldy, shtattyń shyǵys bóligindegi alty aýdanda birneshe adam aýrýhanaǵa jatqyzyldy. Zardap shekkenderdiń eshqaısysy Covid-19 testine oń nátıje bermedi.
Úndistan koronavırýstyń eń qaýipti ekinshi tolqynynan birtindep qalpyna kele bastaǵan kezde, eldegi turǵyny eń kóp shoǵyrlanǵan Ýttar-Pradesh shtatyndaǵy ólim halyq arasynda «jumbaq bezgek» týraly dúrbeleń týdyrdy.
Agra, Matýra, Maınpýrı, Eta, Kasganj jáne Fırozabad syndy birneshe zardap shekken aýdandaǵy dárigerler ólim-jitimniń negizgi sebebi - masalar tasymaldaıtyn Denge bezgegi bolýy múmkin ekenin aıtady. Olardyń aıtýynsha, kóptegen pasıenttiń qanynda trombosıtter sany azaıyp ketken. Bul Denge bezgegi asqynǵanda paıda bolatyn belgilerdiń biri.
«Naýqastar, ásirese balalar, aýrýhanalarda tez óledi», deıdi Fırozabad aýdanynyń densaýlyq saqtaý salasyndaǵy joǵary laýazymdy qyzmetkeri, dáriger Nıta Kýlshresta. Aýdanda sońǵy aptada 40 adam qaıtys boldy, onyń ishinde 32 bala bar.
Denge bezgegi - analyq masalar arqyly taraıtyn tropıkalyq aýrý. Ol týraly derek Úndistanda júzdegen jyldan beri bar. Jalpy atalǵan aýrý álemniń 100-den astam elinde bar, alaıda shamamen 70%-y Azııada tirkelgen. Denge bezgeginiń tórt vırýsy belgili. Balalar eresekterge qaraǵanda ekinshi Denge ınfeksııasynan bes ese jıi óledi.