Aqmola oblysyndaǵy Býrabaı aýdanynyń Zelenyı Bor aýylyndaǵy qus fabrıkasynda taýyqtar ashtan qyrylyp jatyr. Jalaqynyń únemi keshigýine baılanysty qyzmetkerler de kúnin áreń kórip otyrǵanyn aıtady, dep jazady Egemen.kz.
KTK arnasynyń habarlaýynsha, qustarǵa jem eki aptada bir ret beriledi. Ashtyqtan kúnine úsh myńǵa deıin taýyq óledi. Endi qyzmetkerlerdiń jalǵyz mindeti - ólgen qustardy torlardan shyǵarý.
«Mende 50 myń taýyq bolǵan. Endi tek 6 900 ǵana qaldy. Bul - óte qorqynyshty. Kún saıyn ólip jatyr», deıdi bir qus sharýashylyǵynyń ıesi.
Qus fabrıkasynyń qyzmetkerlerine de ashtyq qaýpi tónip tur. Munda jalaqy 50 myńnan az jáne ekinshi aıǵa keshiktirilgen.
«Bes jyl boıy biz jalaqymyzdy ýaqytynda almaımyz, únemi jalynýǵa májbúrmiz. Aqshamyz jem alýǵa da jetpeıdi. Sonymen qatar zeınetaqy shotymyzǵa, medsaqtandyrýǵa da eshteńe aýdarmaıdy», deıdi suryptaýshy Irına Borolıs.
Kezindegi iri qus fabrıkasy qazir óńirdi jumyrtqamen de, etpen de qamtamasyz etýdi áldeqashan toqtatqan. Basshylyqtyń aıtýynsha, másele qysta qust jemi qymbattaǵan kezde bastalǵan. Sodan keıin básekelester naryqqa shyqqan. Endi kompanııa bankrot bolýdyń aldynda tur.
«Basynda maıly daqyl jetispedi. Sodan keıin Prezıdent eksportqa tyıym saldy. Sondaı-aq naryqta Reseı jumyrtqasy kóp. Qazaqstandyq jumyrtqanyń baǵasy tómendep ketti», deıdi «Agro-Invest» JShS basqarýshy dırektory Asqar Aqylbekov.
Kásiporyn basshylary tiri qalǵan qustardy satýdy josparlap otyr. Tabys jalaqy boıynsha bereshekti jabady. Zaýyttyń ózi úsh aıǵa jabylatyn boldy.