QR Premer-Mınıstri Asqar Mamın men QR Prezıdenti Ákimshiliginiń basshysy Erlan Qoshanov Mańǵystaý oblystyq máslıhatynyń kezekten tys sessııasyna qatysty, dep jazady Egemen.kz.
Jıynda óńir ákimi laýazymyna Memleket basshysy Qasym-Jomart Toqaev usynǵan Nurlan Noǵaevtyń kandıdatýrasyna biraýyzdan qoldaý bildirildi.
Mańǵystaý oblysynyń aktıvimen ótken keńeste A. Mamın Serikbaı Trumovtyń óńirdi damytýǵa qosqan úlesin atap ótip, oblys basshysy laýazymynda atqarǵan jumysy úshin alǵys aıtty.
Jańa ákimdi tanystyra otyryp, Úkimet basshysy onyń óńirlik jáne respýblıkalyq deńgeıdegi basshylyq laýazymdarda atqarǵan mol eńbek tájirıbesin atap ótti.
«Jańa ákimniń aldyna óńirdiń keshendi áleýmettik-ekonomıkalyq damýy boıynsha mańyzdy mindetter qoıyldy. Memleket basshysy Qasym-Jomart Toqaev Mańǵystaý oblysynyń damýyna erekshe kóńil bóledi. О́ńir ónerkásip, energetıka, kólik-logıstıka jáne týrıstik salalarda zor áleýetke ıe», dedi A. Mamın.
Premer-Mınıstr ınvestısııalar tartý, jańa jumys oryndaryn qurý, kásipkerlikti qoldaý, halyqtyń turmys sapasyn jaqsartý jáne tabysyn arttyrý jónindegi mindetterdi sheshýdiń mańyzdylyǵyn atap ótti.
Nurlan Noǵaev 1967 jyly týǵan. I. Gýbkın atyndaǵy Máskeý memlekettik munaı jáne gaz akademııasyn, Qazaq memlekettik basqarý akademııasyn, Reseı SIM «Halyqaralyq qatynastar ýnıversıteti» Máskeý memlekettik ınstıtýtyn bitirgen.
Ár jyldary «QazMunaıGaz» UK» AQ, QR Energetıka jáne mıneraldy resýrstar mınıstrliginde basshylyq qyzmetter atqardy, Batys Qazaqstan jáne Atyraý oblystarynyń ákimi boldy.
2019 jylǵy 18 jeltoqsannan bastap QR energetıka mınıstri qyzmetin atqardy.