QR Densaýlyq saqtaý birinshi vıse-mınıstri Marat Shoranov halyqty tumaýǵa qarsy vaksınasııalaý úshin nege reseı vaksınasy tańdalǵanyn túsindirdi, dep habarlaıdy Egemen.kz.
«Tirkelgen barlyq vaksına konkýrsqa qatysa alady. Alaıda, eń aldymen, vaksınasyn eń tómen baǵa usynǵan jetkizýshi tańdalady. Al ónimniń tıimdiligi tirkeý arqyly rastalady», dedi Shoranov OKQ brıfınginde.
Ulttyq qoǵamdyq densaýlyq saqtaý ortalyǵy basqarma tóraǵasynyń orynbasary Aınagúl Qýatbaevanyń aıýynsha, «Grıppol+» vaksınasy bes jyldan beri qoldanylyp kele jatyr jáne tıimdiligin dáleldegen.
Sonymen qatar bul vaksınanyń saqtaý sharttary da medısınalyq uıymdar úshin eń qolaılysy bolyp otyr.
Buǵan deıin Densaýlyq saqtaý mınıstrligi tumaýǵa qarsy vaksınasııa 15 qyrkúıekte bastalatynyn aıtqan bolatyn. Qazirdiń ózinde vaksınanyń 2,5 mıllıon dozasy satyp alynǵan.