Qazaqstandyq joǵary oqý oryndarynda jańa oqý aýdıtorııalary, zerthanalar men ortalyqtar ashyldy, dep jazady Egemen.kz BǴM baspasóz qyzmetine silteme jasap.
Olar Japonııa, Latvııa, Estonııa, Reseı jáne Belarýs ýnıversıtetterimen birlesken ǵylymı zertteýler júrgize bastady. Sondaı-aq QR BǴM vedomstvolyq baǵynyshty ýnıversıtetter materıaldyq-tehnıkalyq bazany jańartyp, stýdentterdi oqytý úshin jańa jabdyqtar satyp aldy.
Mysaly, L.N.Gýmılev atyndaǵy Eýrazııa ulttyq ýnıversıtetinde hımııa jáne fızıka mamandaryn oqytýǵa arnalǵan jańa zerthanalar ashyldy. Olar sheteldik ýnıversıtettermen birlesken zertteýler júrgizedi. Oqý kabınetteri materıaldardyń radıasııalyq turaqtylyǵy, nanotehnologııa nemese kvanttyq-hımııalyq modeldeý sııaqty ǵylymı jumystar men zertteýler júrgizýge arnalǵan tehnologııalarmen jabdyqtalǵan.
«Bilim jáne ǵylym mınıstri A.Aımaǵambetovtiń tapsyrmasy boıynsha qazir biz praktıkalyq sabaqtarǵa erekshe nazar aýdaramyz. Zamanaýı ǵylymı zerthanalardyń ashylýy jas ǵalymdardy daıarlaý sapasyn arttyrady jáne qoldanbaly ári teorııalyq sıpattaǵy ǵylymı-zertteý jumystaryn júrgizýge múmkindik beredi. Búgingi tańda zerthana bazasynda JOO ǵalymdary Tohoký (Japonııa) ýnıversıtetterimen, Latvııadaǵy qatty deneler fızıkasy ınstıtýtymen, Tartý ýnıversıtetiniń fızıka ınstıtýtymen (Estonııa), birikken ıadrolyq zertteýler ınstıtýtymen (RF), Tomsk polıtehnıkalyq ýnıversıtetimen (RF), Belarýs memlekettik ýnıversıtetimen birlesken zertteýler júrgizip jatyr», dep habarlady EUÝ Basqarma tóraǵasy – joo rektory Erlan Sydyqov.
Sondaı-aq EUÝ-da stýdentterge arnalǵan kovorkıng-ortalyq ashyldy. Onyń dızaıny boıynsha jumys stýdentterge tapsyryldy. Endi stýdentter ortalyqta bos ýaqytyn ótkizip, kitap oqı alady, jobalardy talqylaı alady. Jaqyn arada joo-nyń basqa da korpýstarynda osyndaı kovorkıng-ortalyqtar ashý josparda bar.
D.Serikbaev atyndaǵy ShQTÝ ýnıversıtetiniń qabyrǵasynda jańa oqý ortalyqtary paıda boldy. Sý sharýashylyǵy jáne sý paıdalaný salasyndaǵy quzyretter men tehnologııalar transferi ortalyǵy — Qazaqstandaǵy sanaýly ortalyqtardyń biri. Ol gıdravlıka, gıdrohımııa, sýdy keshendi basqarý, jylytý jáne jeldetý zerthanalarynan turady. Ortalyq qyzmetkerleri avtomattandyrylǵan jylý pýnktin jasap, ony ýnıversıtettiń oqý ǵımarattaryna ornatty. Nátıjesinde joo-da jylý energııasyn tutyný 20%-ǵa deıin tómendetildi.
Ál-Farabı atyndaǵy Qazaq ulttyq ýnıversıtetinde mýltımedııalyq aýdıtorııalar men ınjenerlik jobalaý ortalyǵy ashyldy. Olar bilim alýshylarǵa sıfrlandyrý jáne avtomattandyrý salasynda jańa jobalar jasaýǵa múmkindik beretin tehnologııalarmen jabdyqtalǵan.
Y.Altynsarın atyndaǵy Arqalyq pedagogıkalyq ınstıtýtynda aqparattyq tehnologııalar ortalyǵy ashyldy. Ol zamanaýı konstrýktorlarmen, robottar jıyntyǵymen, 3D prınterimen jáne basqa tehnologııalarmen jabdyqtalǵan.Ortalyqta robototehnıka, algorıtmdeý jáne baǵdarlamalaý negizderi boıynsha praktıkalyq sabaqtar ótkiziledi. Osylaısha JOO stýdentterdiń sıfrlyq bilimin jetildirý barysynda jumys júrgizedi.
Sh.Ýálıhanov atyndaǵy Kókshetaý ýnıversıteti beınederektermen jumys isteý úshin baǵdarlamalyq qamtamasyz etý júıesin satyp aldy. Jabdyqtyń kómegimen oqytýshylar oqý úrdisin onlaın rejıminde baqylaıdy. Sondaı-aq JOO-da erte damý jáne ınklıýzıvti bilim berý kabınetteri ashyldy.
Aýdıtorııalar mýltımedııalyq jabdyqtarmen jáne ýnıversıtet oqytýshylary ázirlegen jańa ádistemelik oqý materıaldarymen, quraldarmen jabdyqtalǵan.