Qazir áýejaıda áýe kompanııalary úshin, tipti turaqty jolaýshylar reısteri úshin de avıakerosınmen úzdiksiz qamtamasyz etýde olqylyq bar, dep habarlaıdy Egemen.kz.
«Bıylǵy qyrkúıek jáne qazan aılarynda Qazaqstanda otyn tapshylyǵyna baılanysty kúrdeli jaǵdaı oryn aldy. Qazaqstannyń iri resýrs ustaýshylary men jetkizýshileri avıaotyndy ýaqytyly jetkize almaı otyr, bul qazirgi ýaqytta áýejaıdyń óńirlik kólik toraby retinde qalypty jumys isteýine keri áserin tıgizýde. Máselen, qazir Reseı Federasııasynyń ónim jetkizýshileri birqatar sebepterge, onyń ishinde ishki suranystyń artýyna baılanysty Qazaqstanǵa avıaotyn jetkizýden bas tartyp otyr», dedi «Nursultan Nazarbaev halyqaralyq áýejaıy» AQ baspasóz hatshysy Ánýar Shalekenov.
Qyrkúıek pen qazan aılarynda tapshylyq pen baǵanyń kúrt ósýine baılanysty 14 myń tonna avıaotyn jetkizilmegen. Osyǵan baılanysty búgingi tańda rezervter taýsylyp qalǵan.
«Qarasha aıynda birde-bir jetkizýshi avıaotyn jetkizý kólemin rastamady. Jańa kelisimsharttar boıynsha eń jaqyn aradaǵy jetkizý tek 15 qarashada bolýy múmkin. Biz júk reısterine janarmaı quıýǵa shekteýler engizdik, jaqynda olardy múldem qabyldamaýǵa májbúr bolamyz», deıdi Ánýar Shalekenov.
Nur-Sultan áýejaıy avıaotyn jetkizý týraly qatań kelisimsharttardyń joqtyǵyn, sondaı-aq otynnyń qajetti kóleminiń jetkizilmeýinen týyndaǵan qıyn jaǵdaıdy jáne áýejaıdaǵy bar rezervtiń jumsalǵanyn eskerip, jolaýshylardan aldaǵy ýaqyttarda bolýy yqtımal máselelerge túsinistikpen qaraýdy suraıdy.