Bıylǵy jyldyń on aıynda esirtkige qatysty 169 qylmys anyqtaldy. Onyń ishinde, esirtkini asa iri mólsherde saqtaýdyń – 10, esirtki satýdyń – 22, esirtki ósirýdiń – 41 deregi anyqtaldy. Sondaı-aq, zańsyz aınalymnan barlyǵy 143 kg esirtki zaty tárkilense, onyń 352 gramy sıntetıkalyq esirtki quraly bolyp shyqty. Bul jóninde О́ńirlik kommýnıkasııalar qyzmetinde ótken baspasóz konferensııasynda Qyzylorda oblystyq polısııa departamentiniń Esirtki qylmysyna qarsy is-qımyl basqarmasynyń bastyǵy Erkin Tuńǵyshbaı BAQ ókilderine málimdedi, dep jazady Egemen.kz «Syr boıy» basylymyna silteme jasap.
«Jyl basynan beri esirtkimen baılanysty qylmystyq teris qylyqtardyń 90 deregi anyqtaldy. Osyǵan oraı esirtki qylmysyn anyqtaý boıynsha tıisti jumystar júrgizilgen bolatyn. Atqarylǵan is-sharalardyń nátıjesinde, oblys kóleminde esirtkini nasıhattaý jáne jarnamalardyń 2 deregi tirkelip, olar der kezinde joıyldy. Áleýmettik jeli arqyly sıntetıkalyq esirtkini taratý derekterin anyqtaý maqsatynda departamenttiń qyzmetkerleri qala kóleminde reıdtik is-sharalar júrgizdi. Tıisinshe, oblys ortalyǵynda sıntetıkalyq esirtki jasyrylǵan 75 núkte tabyldy. Olar boıynsha 3 qylmystyq teris qylyq anyqtalyp, 72 derek boıynsha saraptama taǵaıyndaldy. Aýqymdy is-sharalardyń barysynda atalǵan qylmysty jasaǵan Qyzylorda qalasynyń turǵyny quryqtaldy.
Respýblıka kóleminde 1 maýsym – 30 qazan aralyǵynda ótkizilgen «Qarasora-2021» jedel profılaktıkalyq is-sharasy kezinde esirtki ósirýdiń 41 deregi tirkeldi. Atap aıtqanda, 16 derek dalalyq aımaqtan, 25 deregi úı aýlasynan jáne saıajaıdan tabyldy. Esirtki ósirgeni úshin barlyǵy 52 azamat ustaldy. Oqıǵa ornynan barlyǵy 14 myń túpten asatyn sora ósimdigi joıyldy», – dedi Erkin Qarjaýbaıuly.
Aıta ketetin jáıt, tamyz aıynan bastap qumdy dalalyq aımaqtarǵa 21 ret áýeden sholý jumystary júrgizilgen. Birlesken is-sharanyń barysynda esirtki alqabynyń 8 deregi anyqtalyp, esirtkini asa iri mólsherde saqtaýdyń 4 deregi anyqtaldy.