Úkimettiń keıbir fýnksııalary mınıstrlikterge, al olardyń birqatar ókilettikteri ákimdikterge beriledi, dep habarlaıdy Egemen.kz.
Sondaı-aq, mınıstrlikterge de qosymsha ókilettikter júkteledi. Bul baǵyttaǵy jańa normalar «Qazaqstan Respýblıkasynyń keıbir zańnamalyq aktilerine memlekettik basqarý deńgeıleri arasynda ókilettikterdi qaıta bólý máseleleri boıynsha ózgerister men tolyqtyrýlar engizý týraly» zańda jazylǵan. Búgin senatorlar atalǵan zańdy ekinshi oqylymda qabyldady.
Zańǵa sáıkes Bilim jáne ǵylym mınıstrligine qarjy uıymdary beretin bilim berý kredıtterine jáne olardyń mólsherine kepildik berý qaǵıdalaryn bekitý qyzmeti júkteledi. Syrtqy ister mınıstrligi halyqaralyq sharttardyń oryndalýyn qamtamasyz etý isine monıtorıng júrgizýge jaýapty bolady. Sondaı-aq qujatta memlekettik organdar arasyndaǵy ókilettikterdi bólýge qatysty basqa da normalar naqty jazylǵan
Senat Tóraǵasy Máýlen Áshimbaev zań boıynsha pikir bildirip, bul qujattyń memlekettik basqarý júıesin damytýda jáne memlekettik organdardyń derbestigin arttyrýda mańyzdy ekenin atap ótti.
«Zań memlekettik apparat qyzmetiniń tıimdiligin jáne memlekettik qyzmetter kórsetý sapasyn arttyrýdy kózdeıdi. Bul óz kezeginde ortalyq jáne jergilikti atqarýshy organdardyń derbestigi men jaýapkershiligin kúsheıtedi. Aldaǵy ýaqytta osy zań elimizdiń damýyna oń áserin tıgizedi dep senemiz», dedi Máýlen Áshimbaev.