Shymkent qalasynyń ákimi Murat Áıtenov Koreıa Respýblıkasynyń Qazaqstandaǵy Tótenshe jáne О́kiletti Elshisi Ký Hong-Sokpen kezdesti, dep habarlaıdy Egemen.kz.
Mártebeli meıman Qazaqstan men Koreıa arasyndaǵy dıplomatııalyq qarym-qatynas ekonomıkalyq, gýmanıtarlyq salalardaǵy áriptestik baılanystarmen jemisti jalǵasyn tapqandyǵyn málimdedi.
Elshi respýblıkadaǵy úshinshi qala mártebesin ıelengen Shymkent qalasyna tuńǵysh márte kelgendigin jetkizip, bul jumys sapary aıasynda qalamyzben jaqynyraq tanysýdy maqsat tutqanyn atap ótti.
Qala basshysy Koreıa memleketiniń dıplomatııalyq qyzmet jetekshisiniń shýaqty Shymqalaǵa jasaǵan jumys saparyna sáttilik tileı otyryp, qalamyzdyń elimizdegi alar ornyn, onyń búgingi ekonomıkalyq áleýetin keńinen tanystyrdy.
«Shymkent – Qazaqstannyń ońtústigindegi iri óndiristik, saýda, mádenı jáne ǵylym men bilim ortalyǵy. Qalamyzdyń túrli ekonomıkalyq sektorlarynda ınvestısııa tartý múmkindigi qarastyrylǵan. Úsh ındýstrıaldy aımaqta óndiris oryndary shoǵyrlanyp, arnaıy ekonomıkalyq aımaq, saýda-logıstıkalyq ortalyǵy túzildi. Bul aýmaqtar bıznes salymdar úshin tıimdi alań retinde qalyptasyp, ınvestısııalyq jobalardy utymdy iske asyrýǵa jaǵdaı jasaıdy. Investorlarǵa óndiris ornyn salýǵa múmkindik berilip, ınfraqurylymdyq jelilermen qamtamasyz etiledi. Kommýnaldyq tólemderge jeńildikter qarastyrylǵan. Arnaıy ekonomıkalyq aımaq qatysýshylary úshin kedendik jáne salyqtar boıynsha jeńildikter bar», dep atap ótti Murat Dúısenbekuly.
Kezdesý barysynda Qazaqstan men Koreıa arasyndaǵy taýar aınalymy 6,5 mlrd. AQSh dollaryna jetkeni aıtyldy. Qos tarap tımidi ekonomıkalyq baılanystardy nyǵaıtýǵa múddeli ekendikterin jetkizdi.
Kezdesýdi qorytyndylaǵan Shymkent qalasynyń ákimi Murat Áıtenov Qazaqstan men Koreıa arasyndaǵy dıplomatııalyq qatynastarǵa kelesi jyly 30 jyl tolatynyn atap ótti. Osy jyldar ishinde túzilgen senimdi áriptestikti iskerlik baılanystarmen nyǵaıtýǵa Shymkent qalasynyń ákimdigi árqashan daıyn ekendigin málimdedi.