Palata Tóraǵasynyń orynbasary Asqar Shákirov Dúnıejúzilik banktiń Eýropa jáne Ortalyq Azııa óńiri jónindegi Vıse-prezıdenti Anna Berdemen kelissóz júrgizip, Qazaqstannyń osy halyqaralyq uıymmen ózara is-qımyl máselelerin talqylady, dep habarlaıdy Egemen.kz.
Tóraǵa orynbasary Dúnıejúzilik bankpen strategııalyq seriktestiktiń mańyzyn atap ótti. Qazaqstanda qazirgi ýaqytta banktiń kómegimen áleýmettik-ekonomıkalyq jáne ekologııa salalarynda jalpy somasy 3,5 mlrd. dollar bolatyn 12 joba iske asýda.
Anna Berde ınklıýzıvtik ósý, adam kapıtalyn nyǵaıtý, memlekettik sektordyń tıimdiligin arttyrý, eldiń ınstıtýsıonaldyq damýyna járdemdesýdi bank qyzmetiniń Qazaqstandaǵy negizgi baǵyttary retinde belgilegenin aıtty. Bul turǵyda nátıjege baǵdarlanǵan bıýdjetti jetildirýde Úkimetke tehnıkalyq járdemdesý derbes nazar aýdarýdy talap etedi.
Júzdesýshiler Glazgodaǵy klımattyq sammıttiń qorytyndylaryn, Qazaqstandaǵy býlaný nátıjesindegi shyǵaryndylardy 15%-ǵa azaıtý, kómirteginen beıtarap bolýǵa 2060 jylǵa deıin qol jetkizý jónindegi josparlaryn talqylady. Qazaqstan Respýblıkasynyń Prezıdenti Qasym-Jomart Toqaevtyń elimizde Ornyqty damý jónindegi Ortalyq Azııa Aımaqtyq klımattyq habyn qurý bastamasyna qoldaý bildirildi.
Dúnıejúzilik banktiń Vıse-prezıdenti Qazaqstandaǵy býlaný nátıjesindegi shyǵaryndylardy azaıtýǵa yqpal etetin mal sharýashylyǵyn turaqty damytý baǵdarlamasyn tez arada ratıfıkasııalaýǵa múddeli ekenin jetkizdi. Osyǵan baılanysty mal sharýashylyǵy salasyn damytý quraldaryn jetildirý arqyly klımattyq ózgeristerge qarsy kúrestegi Qazaqstannyń kóshbasshylyǵy atap ótildi.
«Sý resýrstaryn tıimdi paıdalaný jáne qorshaǵan ortany qorǵaýmen birge Ornyqty damý máseleleriniń mán-mańyzy birinshi dárejege ıe ári barshaǵa ortaq. Aral teńizi apatynyń saldarymen kúres Ortalyq Azııa memleketteriniń ortaq problemasy bolyp tabylady jáne eki jáne kópjaqty negizde sheshilýi tıis», dedi Senat Tóraǵasynyń orynbasary. Banktiń qoldaýymen júzege asqan ekologııalyq jobalar sý deńgeıiniń joǵarylaýyna, Aral teńiziniń soltústik bóligindegi balyq aýlaýdy qalpyna keltirýge, sondaı-aq jalpy ekologııalyq jaǵdaıdy jaqsartýǵa yqpal etti.
Dúnıejúzilik bank ókili Ornyqty damý maqsattaryn iske asyrýda Qazaqstanǵa járdemdesýge jáne klımattyń ózgerýine qarsy kúreste bastamalardy ilgeriletýge yqpal etýgedaıyn ekendigin bildirdi.